నగరాల్లో సరకు రవాణాకు సులువైన యాప్‌

ఐఐటీ పరిశోధకుల ఘనత

దిల్లీ: నగరాల్లో సరకులను మరింత సమర్థంగా, సులువుగా రవాణా చేయడానికి మద్రాస్‌ ఐఐటీ పరిశోధకులు ఒక మొబైల్‌ యాప్‌ను అభివృద్ధి చేశారు. ఇది మధ్యవర్తుల ప్రమేయానికి అడ్డుకట్ట వేస్తుందని చెప్పారు. ‘ఆప్ట్‌రూట్‌’ అనే ఈ యాప్‌.. డ్రైవర్‌తో వినియోగదారుడిని అనుసంధానిస్తుంది. ఈ లావాదేవీల్లో కమీషన్లు చెల్లించాల్సిన అవసరం ఉండదు. చెల్లింపులు కూడా వినియోగదారుడి నుంచి నేరుగా డ్రైవర్‌కు వెళతాయి. ఈ యాప్‌నకు సంబంధించిన మొదటి వెర్షన్‌.. మద్రాస్‌ ఐఐటీలో ఏర్పాటైన ఆప్ట్‌రూట్‌ లాజిస్టిక్స్‌ అనే అంకురపరిశ్రమ అభివృద్ధి చేసి, వాణిజ్య ప్రాతిపదికన అందుబాటులోకి తెచ్చింది. ‘‘సరకు రవాణా విషయంలో డ్రైవర్లు, వినియోగదారులకు మధ్య ఉన్న సంధానత సమస్యను ఈ యాప్‌ పరిష్కరిస్తుంది. తిరుగుప్రయాణంలో లోడ్‌ లేకపోవడం, వాహనం పూర్తి సామర్థ్యంతో తిరగకపోవడం వంటి సమస్యలను ప్రస్తుతం రవాణాదారులు ఎదుర్కొంటున్నారు. ఈ రంగంలోని మార్కెట్‌ వ్యవస్థీకృతంగా, సమర్థంగా కూడా లేదు. సాంకేతిక పరిజ్ఞానంతో ఈ ఇబ్బందులను పరిష్కరించొచ్చు’’ అని మద్రాస్‌ ఐఐటీ ప్రొఫెసర్‌ ఎన్‌.ఎస్‌.నారాయణస్వామి తెలిపారు. ప్రస్తుతం ఈ యాప్‌ సేవలను హైదరాబాద్‌, బెంగళూరు, చెన్నై సహా దేశంలోని పలు నగరాల్లో అందుబాటులోకి తెచ్చారు.