తీవ్రవాద గ్రూపుల మధ్య కాల్పులు

మణిపుర్‌లో 13 మంది పీఎల్‌ఏ సభ్యుల మృతి

ఇంఫాల్‌: మణిపుర్‌లోని తెంగ్నౌపాల్‌ జిల్లాలో సోమవారం రెండు తీవ్రవాద గ్రూపుల మధ్య కాల్పులు చోటుచేసుకున్నాయి. నిషేధిత పీఎల్‌ఏ తీవ్రవాద సంస్థకు చెందిన 13 మంది సభ్యులు ఈ ఘటనలో మరణించారు. పోలీసులకు సమాచారం అందిన వెంటనే మయన్మార్‌ సరిహద్దుకు 15 కిలోమీటర్ల దూరంలోని లీతు గ్రామానికి ప్రత్యేక బృందాలను పంపినట్లు అధికారులు తెలిపారు. అక్కడ 13 మృతదేహాలు కనిపించాయి. ఆ మృతదేహాలను పీపుల్స్‌ లిబరేషన్‌ ఆర్మీ (పీఎల్‌ఏ) సంస్థకు చెందిన సభ్యులవిగా అధికారులు గుర్తించారు. చట్టవ్యతిరేక కార్యకలాపాల నిరోధక చట్టం కింద పీఎల్‌ఏపై గతంలోనే నిషేధం విధించగా ఇటీవలే పొడిగించారు. మృతదేహాల సమీపంలో ఎలాంటి ఆయుధాలు, మందుగుండు దొరకలేదని అధికారులు తెలిపారు. ‘‘సోమవారం తెంగ్నౌపాల్‌ జిల్లాలోని లీతు గ్రామ సమీపం నుంచి ఓ తీవ్రవాద గ్రూపు బృందం మయన్మార్‌ వైపు వెళుతోంది. ఈ క్రమంలో ఆ ప్రాంతంలో ప్రాబల్యం ఉన్న మరో గ్రూపు సభ్యులు వారిపై కాల్పులు జరిపారు. ప్రతిగా అవతలి వర్గం కూడా కాల్పులు ప్రారంభించింది. ఈ క్రమంలో 13 మంది మృతి చెందారు’’ అని ఓ అధికారి తెలిపారు.