రెండు ఆరోపణల్లోనూ రాఘవ చడ్డా దోషే

స్పష్టీకరించిన రాజ్యసభ హక్కుల కమిటీ నివేదిక
గతంలో విధించిన సస్పెన్షన్‌ ఎత్తివేత

దిల్లీ: తప్పుదోవ పట్టించే విషయాలను మీడియాకు అందించిన అంశంలో ఆమ్‌ ఆద్మీ పార్టీ ఎంపీ రాఘవ్‌ చడ్డాను రాజ్యసభ హక్కుల కమిటీ దోషిగా నిర్ధారించింది. అలాగే ప్రతిపాదిత సెలెక్ట్‌ కమిటీకి సభ్యుల అంగీకారం లేకుండానే వారిపేర్లను జాబితాలో చూపించిన విషయంలోనూ దోషిగా తేల్చింది. దీనికి సంబంధించిన నివేదికను సోమవారం రాజ్యసభ ఛైర్మన్‌కు సమర్పించింది. మరోపక్క భాజపా సభ్యుడు జీవీఎల్‌ నరసింహారావు ప్రవేశపెట్టిన తీర్మానాన్ని మూజువాణి ఓటుతో ఆమోదించడం ద్వారా చడ్డా మీద విధించిన సస్పెన్షన్‌ వేటును రాజ్యసభ ఎత్తేసింది. ఆయన సభకు హాజరయ్యేందుకు ఛైర్మన్‌ జగదీప్‌ ధన్‌ఖడ్‌ అనుమతించారు. తాజా పరిణామంతో 115 రోజుల తర్వాత ఆయన మళ్లీ పార్లమెంట్‌ సమావేశాలకు హాజరయ్యారు. రాఘవ్‌ చడ్డాను ఈ ఏడాది ఆగస్టు 11న రాజ్యసభ నుంచి నిరవధికంగా సస్పెండ్‌ చేసిన విషయం తెలిసిందే. హక్కుల కమిటీ నివేదికపై రాజ్యసభ ఛైర్మన్‌ ధన్‌ఖడ్‌ మాట్లాడుతూ.. ‘‘రెండు అభియోగాల్లో చడ్డా దోషిగా తేలారు. ఒకటి.. ఆయన ఉద్దేశపూర్వకంగా మీడియాకు తప్పుదోవ పట్టించే సమాచారమిచ్చారని కమిటీ గుర్తించింది. రెండోది..దిల్లీ బిల్లుకు సంబంధించిన ప్రతిపాదిత కమిటీలో కొందరు ఎంపీల పేర్లను వారి సమ్మతి లేకుండానే చేర్చినట్లు తేలింది’’ అని తెలిపారు.