కళాశాల విద్యార్థికి రూ.46 కోట్ల పన్ను నోటీసులు

గ్వాలియర్‌: మధ్యప్రదేశ్‌కు చెందిన ఓ విద్యార్థికి రూ.46 కోట్ల పన్ను నోటీసులు రావడం కలకలం రేపింది. గ్వాలియర్‌లో నివాసముంటున్న ప్రమోద్‌ కుమార్‌ దండోటియా అనే విద్యార్థి స్థానిక కళాశాలలో చదువుకుంటున్నాడు. అతడి బ్యాంకు ఖాతా నుంచి రూ.46 కోట్ల లావాదేవీలు జరిగాయని, ఈ మొత్తానికి ఐటీ, జీఎస్టీ చెల్లించాలని ఇటీవల ప్రమోద్‌కు నోటీసులు వచ్చాయి. దీంతో కంగుతిన్న అతడు సంబంధిత అధికారులను సంప్రదించగా.. తన పాన్‌ కార్డుపై ఓ కంపెనీ రిజిస్టర్‌ అయినట్లు తెలిసింది. ఆ కంపెనీ 2021 నుంచి ముంబయి, దిల్లీ వేదికగా కార్యకలాపాలు సాగించిందని వెల్లడైంది. దీంతో అతడు వెంటనే పోలీసులకు ఫిర్యాదు చేశాడు. ఆ లావాదేవీలకు తనకు ఎలాంటి సంబంధం లేదని, కంపెనీ గురించి తనకు తెలియదని పేర్కొన్నాడు. దీనిపై కేసు నమోదు చేసుకున్న పోలీసులు దర్యాప్తు చేపట్టారు. ‘ఆ విద్యార్థి పాన్‌ కార్డును గుర్తుతెలియని వ్యక్తులు దుర్వినియోగం చేసి కంపెనీని రిజిస్టర్‌ చేశారు. ఆ తర్వాతే అతడి బ్యాంకు ఖాతా నుంచి రూ.కోట్లలో లావాదేవీలు జరిగాయి. దీనిపై దర్యాప్తు కొనసాగుతోంది’ అని పోలీసులు వెల్లడించారు.