ఈవీఎం, వీవీప్యాట్‌ విడి పరికరాల తయారీదారుల వివరాలను మేం బహిర్గతపరచలేం..

ఈసీఐఎల్‌, బెల్‌ల స్పష్టీకరణ

దిల్లీ: ఈవీఎం, వీవీప్యాట్‌ యంత్రాల విడి పరికరాల తయారీదారుల వివరాలను బహిర్గతపరచలేమని ఎలక్ట్రానిక్స్‌ కార్పొరేషన్‌ ఆఫ్‌ ఇండియా లిమిటెడ్‌(ఈసీఐఎల్‌), భారత్‌ ఎలక్ట్రానిక్స్‌ లిమిటెడ్‌(బీఈఎల్‌) స్పష్టం చేశాయి. ఈ మేరకు ఆ వివరాలను తెలియజేయాలని సమాచార హక్కు చట్టం ద్వారా కోరిన వెంకటేశ్‌ నాయక్‌ అనే కార్యకర్త అభ్యర్థనలను తిరస్కరించాయి. సమాచార హక్కు చట్టంలోని సెక్షన్‌ 8(1)డి.. వాణిజ్య విశ్వాసం, గోప్యత, మేధో సంపత్తితో కూడిన సమాచారాన్ని బహిర్గతం చేయకుండా మినహాయింపునిస్తుందని, దీని ప్రకారం ఈ సమాచారాన్ని తెలియజేయడానికి నిరాకరిస్తున్నట్లు సదరు కంపెనీలు తెలిపాయి. అయితే దేశంలో కోట్లాది మంది ఓటర్లకు ఓటింగ్‌ యంత్రాల గురించి తెలుసుకునే హక్కు ఉందని, ప్రధాన తయారీదారులు (ఈసీఐఎల్‌, బెల్‌) బయటి కంపెనీల ప్రమేయం లేకుండా ఈ భాగాలను తయారుచేస్తున్నాయని హామీ ఇస్తే సమంజసంగా ఉంటుందని నాయక్‌ అన్నారు. ఈవీఎంలకు సంబంధించిన ప్రతి విషయాన్ని ఓటర్లు తెలుసుకోవాలని భావిస్తున్నారని స్పష్టంచేశారు.