ఆప్‌ ఎమ్మెల్యే అమానతుల్లా ఖాన్‌కు మరోసారి ఈడీ సమన్లు

దిల్లీ: ఆప్‌ ఎమ్యెల్యే అమానతుల్లా ఖాన్‌కు ఈడీ మరోసారి సమన్లు జారీ చేసింది. దిల్లీ వక్ఫ్‌ బోర్డుకు ఆయన ఛైర్మన్‌గా వ్యవహరించిన సమయంలో అవకతవకలకు సంబంధించి హవాలా కేసులో 29న దిల్లీలోని ఈడీ కార్యాలయానికి వచ్చి తన వాంగ్మూలాన్ని కొనసాగించవలసిందిగా కోరింది. ఈ కేసులో ముందస్తు బెయిల్‌ను కోరుతూ ఈ నెల 18న అమానతుల్లా సుప్రీంకోర్టును ఆశ్రయించిన విషయం తెలిసిందే. దీనిని తిరస్కరించిన సర్వోన్నత న్యాయస్థానం ఖాన్‌ను దర్యాప్తుకు సహకరించాలని కోరింది. దీంతో గతవారం కేంద్ర దర్యాప్తు సంస్థ ఆయన్ను 13గంటలపాటు విచారించింది. తాజాగా ఈ విచారణను కొనసాగించేందుకు మరోసారి సహకరించాలని కోరింది. మరోవైపు ఇదే కేసులో అదనపు చీఫ్‌ మెట్రోపాలిటన్‌ మేజిస్ట్రేట్‌ దివ్య మల్హోత్రా శనివారం అమానతుల్లా ఖాన్‌కు రూ.15 వేల బాండ్‌, ఒకరి పూచీకత్తుపై బెయిల్‌ను మంజూరు చేయడం గమనార్హం.