జోషి, ఆడ్వాణీ ఆశీస్సులు తీసుకున్న మోదీ

దిల్లీ: ఎన్డీయే పార్లమెంటరీ పార్టీ నేతగా ఎన్నికైన నరేంద్ర మోదీ శుక్రవారం భాజపా కురువృద్ధుడు, మాజీ ఉప ప్రధాని ఎల్‌.కె.ఆడ్వాణీని మర్యాదపూర్వకంగా కలిశారు. ఎన్డీయే పార్లమెంటరీ పార్టీ సమావేశం ముగిసిన తర్వాత నేరుగా ఆడ్వాణీ ఇంటికి వెళ్లిన ప్రధాని వరుసగా మూడోసారి ప్రభుత్వాన్ని ఏర్పాటుచేయబోతున్న విషయాన్ని ఆయనకు తెలిపారు. ఇరువురు నేతలూ వివిధ అంశాలపై కొద్దిసేపు చర్చించుకున్నారు. అక్కడి నుంచి పార్టీ సీనియర్‌ నేత మురళీ మనోహర్‌ జోషి ఇంటికి మోదీ వెళ్లారు. ఆయన ఆశీర్వాదమూ తీసుకున్నారు. అనంతరం మాజీ రాష్ట్రపతి రామ్‌నాథ్‌ కోవింద్‌ నివాసానికి వెళ్లి ఆయనను కలిశారు.