Heavy Competition: ఉన్నది ఒక్క పోస్టు.. 10 వేల మందికిపైగా పోటీ

ఒక్క పోస్టు కోసం 10 వేల మందికిపైగా అభ్యర్థులు పోటీ పడుతున్నారు. వారి కోసం 43 పరీక్ష కేంద్రాలను ఏర్పాటుచేశారు. దేశంలో నిరుద్యోగ సమస్య తీవ్రతను తెలియజేసే ఈ ఘటన హిమాచల్‌ ప్రదేశ్‌లో చోటుచేసుకుంది. హమీర్‌పుర్‌ సాంకేతిక విశ్వవిద్యాలయంలో జూనియర్‌ ఆఫీస్‌ అసిస్టెంటు పోస్టును భర్తీ చేయడానికి ఇటీవల నోటిఫికేషన్‌ విడుదల చేశారు. డిగ్రీ, కంప్యూటర్‌ డిప్లొమా విద్యార్హతలుగా ఉన్న ఈ పోస్టు కోసం ఇప్పటివరకూ 22,410 మంది దరఖాస్తు చేసుకున్నారు. వారిలో ఫీజు చెల్లించిన 10,386 మందికి హాల్‌ టికెట్లు జారీ చేశారు. ఈ నెల 9న నిర్వహించే పరీక్ష కోసం రాష్ట్రవ్యాప్తంగా 43 కేంద్రాలను ఏర్పాటు చేశారు. ఫీజు చెల్లించడానికి ఈ నెల 3 వరకూ గడువు ఉందని, ఆలోపు అభ్యర్థుల సంఖ్య మరింత పెరిగే అవకాశం ఉందని అధికారులు తెలిపారు.