Himanta Biswa Sarma: ‘రాహుల్‌, ప్రియాంక అమూల్‌ బేబీలు’.. అస్సాం సీఎం హిమంత వ్యంగ్యాస్త్రాలు

గువహటి: కాంగ్రెస్‌ అగ్రనేతలు రాహుల్‌ గాంధీ, ప్రియాంక గాంధీలపై అస్సాం ముఖ్యమంత్రి హిమంత బిశ్వశర్మ (Himanta Biswa Sarma) మరోసారి వ్యంగ్యాస్త్రాలు ఎక్కుపెట్టారు. వారిద్దరూ ‘అమూల్‌ బేబీలు’ అని అభివర్ణించారు. ఓ మీడియా సమావేశంలో పాల్గొన్న ఆయన ఈ వ్యాఖ్యలు చేశారు.

ఇటీవల అస్సాంలో ప్రియాంక గాంధీ చేపట్టిన రోడ్‌ షోపై హిమంత స్పందించారు. ‘‘గాంధీ కుటుంబంలోని అమూల్‌ బేబీలను చూసేందుకు రాష్ట్ర ప్రజలు ఎందుకు వెళతారు? వారి ఎన్నికల ప్రచారానికి బదులు కజిరంగా నేషనల్‌ పార్క్‌కు వెళ్లడం మేలనుకుంటారు’’ అని అన్నారు.

అమేఠీ నుంచి పోటీపై రాహుల్‌ గాంధీ ఏం చెప్పారంటే..?

తనకు తెలిసినంత వరకు కాంగ్రెస్‌ ఎంపీ గౌరవ్‌ గొగోయ్‌తో కలిసి ప్రియాంక చేపట్టిన రోడ్‌ షోకు 2 నుంచి 3 వేల మంది మాత్రమే హాజరయ్యారని ఎద్దేవా చేశారు. గాంధీ కుటుంబాన్ని చూడటం వల్ల తమకు ఎలాంటి ప్రయోజనం లేదని ప్రజలు భావిస్తున్నారన్నారు. అందుకే ఆ రోడ్‌ షోలో జనం లేరని వ్యాఖ్యానించారు.