Online Betting: ఆన్లైన్ బెట్టింగ్‌పై కేంద్రం సీరియస్‌.. ప్రకటనలు చేయొద్దంటూ సూచన

దిల్లీ: ఆన్​లైన్​ బెట్టింగ్​ ప్లాట్​ఫామ్స్‌కు సంబంధించి ప్రచార ప్రకటనలకు దూరంగా ఉండాలని ప్రింట్​, ఎలక్ట్రానిక్​, డిజిటల్​ మీడియాలకు కేంద్ర ప్రభుత్వం అడ్వైజరీ జారీ చేసింది. దేశంలోని అనేక ప్రాంతాల్లో ఆన్​లైన్​ బెట్టింగులు, గ్యాంబ్లింగ్ లాంటి కార్యకలాపాలు​ చట్టవిరుద్ధమని వెల్లడించింది. వినియోగదారులకు ఇలాంటివి ఆర్థిక, సామాజిక నష్టాన్ని పెంచుతాయని కేంద్ర సమాచార, ప్రసారాల మంత్రిత్వ శాఖ పేర్కొంది. ఇటీవల ప్రింట్​, ఎలక్ట్రానిక్​, సోషల్​​, ఆన్​లైన్​ మీడియాల్లో ఆన్​లైన్​ బెట్టింగ్​ వెబ్​సైట్లు​ ప్రకటనలు పెరుగుతున్న నేపథ్యంలో ఈ ప్రకటన చేసింది. ప్రజాప్రయోజనాలను దృష్టిలో ఉంచుకుని ఈ సూచనలు చేసినట్లు పేర్కొంది.

‘దేశంలోని చాలా ప్రాంతాలలో బెట్టింగ్‌, జూదం  చట్టవిరుద్ధం. ఇవి వినియోగదారులకు, ముఖ్యంగా యువత, పిల్లలకు గణనీయమైన ఆర్థిక, సామాజిక  ప్రమాదాన్ని కలుగజేస్తాయి. అందుకే ఆన్​లైన్​ బెట్టింగ్‌లకు సంబంధించిన ప్రకటనలను ప్రచురించవద్దు. ఆయా ప్రకటనల ద్వారా చట్టవిరుద్ధమైన ఈ చర్యను ప్రోత్సహించినట్లవుతుంది. ఆన్​లైన్​ అడ్వెర్టయిజ్‌​మెంట్​ పబ్లిషర్లు​, మధ్యవర్తులు​ సహా ఆన్​లైన్​, సోషల్​ మీడియాలు సైతం బెట్టింగ్‌ ప్రకటనలకు దూరంగా ఉండాలి’అని మంత్రిత్వ శాఖ ప్రకటనలో తెలిపింది.