Nijjar: నిజ్జర్‌ హత్యపై డాక్యుమెంటరీ.. భారత్‌లో నిషేధం

ఇంటర్నెట్‌ డెస్క్‌: ఖలిస్థానీ ఉగ్రవాది హర్‌దీప్‌ సింగ్‌ నిజ్జర్‌ (Hardeep Singh Nijjar) హత్య విషయంలో భారత్‌ను (India) ఉద్దేశిస్తూ కెనడా (Canada) ప్రధాని జస్టిన్‌ ట్రూడో చేసిన వ్యాఖ్యలతో ఇరు దేశాల మధ్య దౌత్య సంబంధాలు దెబ్బతిన్నాయి. ఆ విభేదాలు కొనసాగుతున్న వేళ.. కెనడా మీడియా వ్యవహరించిన తీరు ఈ ఉద్రిక్తతలను మరోసారి పెంచింది. నిజ్జర్ హత్యపై ఆ దేశ మీడియా సంస్థ ఓ డాక్యుమెంటరీని ప్రసారం చేసింది. దీనిపై తీవ్ర అభ్యంతరం వ్యక్తంచేసిన కేంద్ర ప్రభుత్వం.. డాక్యుమెంటరీ (Documentary)పై నిషేధం విధించింది.

కెనడా ప్రభుత్వం అండతో నడిచే సీబీసీ అనే వార్తా సంస్థ.. ‘ది ఫిఫ్త్‌ ఎస్టేట్‌’ పేరుతో ఇన్వెస్టిగేటివ్‌ ప్రోగ్రామ్‌ను నిర్వహిస్తోంది. ఇటీవల ఇందులోని ఓ ఎపిసోడ్‌లో నిజ్జర్‌ హత్యపై డాక్యుమెంటరీని ప్రసారం చేసింది. ‘కాంట్రాక్ట్‌ టు కిల్‌’ పేరుతో రూపొందించిన 45 నిమిషాల వీడియోలో ఘటనకు సంబంధించిన సీసీటీవీ దృశ్యాలు కూడా ఉన్నాయి. దీంతో ఇది కాస్తా మరోసారి వివాదానికి తెరతీసింది. ఈ డాక్యుమెంటరీ ఏకపక్షంగా ఉందని కొందరు ఇండో-కెనడియన్‌ కమ్యూనిటీ సభ్యులు ఆరోపించారు.

భారత్‌-చైనా సాయుధ ఘర్షణకు అవకాశం: అమెరికా ఇంటెలిజెన్స్‌ హెచ్చరికలు

దీనిపై కేంద్ర ఐటీ, సమాచార మంత్రిత్వ శాఖ తీవ్ర అభ్యంతరం వ్యక్తంచేసింది. నిబంధనలకు విరుద్ధంగా ఉన్న ఈ వీడియోపై నిషేధం విధించింది. దీన్ని భారత్‌లో ప్రసారం చేయొద్దని యూట్యూబ్‌, ఎక్స్‌ వంటి మాధ్యమాలను ఆదేశించింది. దీంతో ఈ డాక్యుమెంటరీని భారత యూజర్లు చూడకుండా ఆ మాధ్యమాలు యాక్సెస్‌ను పరిమితం చేశాయి. అయితే, ప్రపంచవ్యాప్తంగా మిగతాచోట్ల ఇది ప్రసారం అవుతుండటం గమనార్హం.

2023 జులై 18న బ్రిటిష్‌ కొలంబియాలోని సర్రే ప్రాంతంలో ఓ గురుద్వారా వెలుపల నిజ్జర్‌ హత్య జరిగిన విషయం తెలిసిందే. ఈ ఘటనలో భారత్‌ ఏజెంట్ల పాత్ర ఉందంటూ కెనడా ప్రధాని జస్టిస్‌ ట్రూడో చేసిన ఆరోపణలతో ఇరుదేశాల మధ్య విభేదాలు భగ్గుమన్నాయి. ట్రూడో ఆరోపణలను భారత్‌ ఖండించింది. ఆధారాల్లేకుండా నిందలు వేయడం తగదని గట్టిగా హెచ్చరించింది. ఇటీవల ఈ ఘటనకు సంబంధించిన సీసీటీవీ దృశ్యాలు కెనడాలో వైరల్‌ అయ్యాయి.