ED: చైనీయులకు వీసా కేసు.. ‘కార్తి చిదంబరం రూ.50 లక్షల లంచం తీసుకున్నారు’ : ఈడీ

దిల్లీ: చైనీయులకు అక్రమంగా వీసా అనుమతులు ఇప్పించిన కేసులో ఆరోపణలు ఎదుర్కొంటున్న కార్తి చిదంబరంపై ఎన్‌ఫోర్స్‌మెంట్‌ డైరెక్టరేట్‌ గురువారం కీలక వ్యాఖ్యలు చేసింది. ఈ కేసుకు సంబంధించి ఓ సన్నిహితుడి దగ్గర నుంచి రూ.50లక్షలను కార్తి అక్రమంగా స్వీకరించాడని ఆరోపించింది. ఇలా వచ్చిన నగదును ఆయన డైరెక్టర్‌గా ఉన్న ఓ కంపెనీలోకి మళ్లించినట్లు పేర్కొంది.

ఈ కేసుకు సంబంధించి శివగంగా లోక్‌సభ స్థానం ఎంపీగా ఉన్న కార్తి చిదంబరంను పలుమార్లు విచారించిన ఈడీ.. ఆయన స్టేట్‌మెంట్లను రికార్డు చేసింది. ఇందుకు సంబంధించి ఇటీవల దాఖలు చేసిన ఛార్జిషీట్‌లో కార్తితోపాటు ఆయన సన్నిహితుడు భాస్కరరామన్‌పై ఈ అభియోగాలు మోపింది. మార్చి 19న ప్రాసిక్యూషన్‌ ఫిర్యాదును పరిగణనలోకి తీసుకున్న దిల్లీలోని పీఎంఎల్‌ఏ న్యాయస్థానం.. ఏప్రిల్‌ 15న హాజరుకావాలంటూ కార్తితోపాటు ఇతర నిందితులకు సమన్లు జారీ చేసింది.

‘ఎన్నికల బాండ్ల పూర్తి వివరాలు ఇచ్చేశాం’: సుప్రీంలో ఎస్‌బీఐ అఫిడవిట్‌

భారీగా నగదు తీసుకొని చైనాకు చెందిన 250 మందికి వీసాలు ఇప్పించారన్నది కార్తి చిదంబరంపై ఉన్న ప్రధాన ఆరోపణ. ఆయన తండ్రి పి.చిదంబరం కేంద్ర హోంమంత్రిగా ఉన్న సమయంలో ఈ వ్యవహారం జరిగిందని సీబీఐ వెల్లడించింది. దీనిపై దేశవ్యాప్తంగా పలు ప్రాంతాల్లో సోదాలు నిర్వహించింది. చిదంబరం సన్నిహితుడు, ఈ కేసుతో సంబంధం ఉన్న భాస్కరరామన్‌ను సీబీఐ ఇటీవల అరెస్టు చేసింది.