Indian Railways: అనువాదం తెచ్చిన తంటా! ‘ట్రాన్స్‌లేషన్‌’తో రైల్వే అభాసుపాలు

ఇంటర్నెట్‌డెస్క్‌: ఒక భాషలోని పదాన్ని మరో భాషలోకి మార్చే క్రమంలో తగు జాగ్రత్తలు అవసరం. ఏ మాత్రం నిర్లక్ష్యంగా వహించినా అర్థం మారిపోయి అభాసుపాలయ్యే అవకాశం ఉంది. సరిగ్గా ఇలాంటి తప్పిదమే భారతీయ రైల్వే (Indian Railways)లో జరిగింది. హిందీలో ఉన్న ఓ ప్రాంతం పేరును యథాతథంగా మలయాళంలోకి అనువాదం చేసిన సిబ్బంది.. దాన్ని రైల్వే సూచిక బోర్డు మీదా పొందుపర్చారు. తీరా అది కాస్తా వేరే అర్థానికి దారితీయడంతో.. ఈ వ్యవహారం కాస్త నెట్టింట వైరల్‌గా మారింది.

మోదీతో ‘గేమ్‌’.. ఆ సొట్ట బుగ్గల సుందరి ఎవరు..?

ఝార్ఖండ్‌లోని హటియా నుంచి కేరళలోని ఎర్నాకుళం మధ్య ‘హటియా ఎర్నాకుళం ధర్తీ ఎక్స్‌ప్రెస్‌’ రాకపోకలు సాగిస్తుంది. ఆ రైలు బోర్డుపై ‘హటియా’ అనే పదాన్ని మలయాళంలో రాయకుండా దాన్ని అనువాదం చేశారు. ఈ క్రమంలోనే హటియా కాస్తా ‘హత్య’గా మారింది. మలయాళంలో అదే అర్థం వచ్చే పదాన్ని బోర్డుపై ఎక్కించడం గమనార్హం. దీంతో తప్పిదంతో కూడుకున్న బోర్డు ఫొటో నెట్టింట చక్కర్లు కొడుతోంది. ఆన్‌లైన్‌ ట్రాన్స్‌లేషన్‌ మీద అతిగా ఆధారపడి, ఉన్నది ఉన్నట్టు అనువదిస్తే ఇలాగే ఉంటుందని నెటిజన్లు స్పందించారు. అనువాద క్రమంలో ఈ తప్పు జరిగిందని, గుర్తించిన వెంటనే దాన్ని సరిచేశామని రాంచీ డివిజన్‌ అధికారులు వివరణ ఇచ్చారు.