Viral video: మనవరాళ్లతో నితిన్‌ గడ్కరీ..వీడియో వైరల్‌

దిల్లీ: భారతీయ జనతా పార్టీ (భాజపా) సీనియర్ నాయకుడు నితిన్ గడ్కరీ(Nitin Gadkari) సోషల్‌ మీడియాలో షేర్‌ చేసిన వీడియో వైరల్‌గా మారింది. వీడియోలో గడ్కరీని చూడడానికి వచ్చిన ఆయన మనవరాళ్లను ప్రేమతో కౌగిలించుకొని ఆనందం వ్యక్తంచేస్తున్న దృశ్యాలు నెటిజన్లను ఆకట్టుకుంటున్నాయి.  నా మనవరాళ్ల రాక అనుకోని ఆనందాన్ని తెచ్చింది, నా రోజును మరింత ప్రకాశవంతం చేసింది అంటూ ఆయన వీడియోకు వ్యాఖ్యను జత చేశారు.

లోక్‌సభ ఎన్నికల్లో నితిన్‌ గడ్కరీ నాగ్‌పుర్ లోక్‌సభ నియోజకవర్గం నుంచి వరుసగా మూడోసారి గెలుపొందారు. కాంగ్రెస్‌ అభ్యర్థిపై 1,37,603 ఓట్ల తేడాతో విజయకేతనం ఎగురవేశారు. దీంతో వారి ఇంట్లో సందడి నెలకొంది. కుటుంబసభ్యులు, కార్యకర్తలు, పార్టీ నేతలు ఆయనకు అభినందనలు తెలుపుతున్నారు. 

ఎంపీగా నియోజకవర్గ అభివృద్ధికి మరింత పట్టుదలతో పని చేస్తానని గడ్కరీ పేర్కొన్నారు. నాగ్‌పుర్‌ను దేశంలోనే అత్యంత సుందరమైన, పరిశుభ్రమైన, కాలుష్య రహిత నగరంగా తీర్చిదిద్దాలన్న తన కలను నెరవేర్చేందుకు కృషి చేస్తానన్నారు. నాగ్‌పూర్, విదర్భ ప్రాంతాల్లో పారిశ్రామికీకరణను అభివృద్ధి చేసి యువతకు ఉపాధి అవకాశాలు కల్పిస్తామని హామీ ఇచ్చారు.