Chandrayaan-3: చంద్రుడిపై నడయాడిన భారత్‌: ఇస్రో ట్వీట్‌

బెంగళూరు: జాబిల్లి యాత్రల్లో ఇప్పటిదాకా ఏ దేశమూ అందుకోలేకపోయిన సంక్లిష్ట లక్ష్యాన్ని ఇస్రో విజయవంతంగా ఛేదించి చరిత్ర సృష్టించింది. చందమామ దక్షిణ ధ్రువం వద్ద విక్రమ్‌ ల్యాండ్ అయిన దాదాపు నాలుగు గంటల తర్వాత దాని లోపలి నుంచి ప్రగ్యాన్‌ రోవర్ సాఫీగా బయటకు వచ్చింది. దీనిపై భారత అంతరిక్ష పరిశోధన కేంద్రం (ISRO) స్పందించింది. 

‘చంద్రయాన్‌-3(Chandrayaan-3) రోవర్‌ చంద్రుడి కోసం భారత్‌లో తయారైంది. అది ల్యాండర్‌ నుంచి సాఫీగా బయటకు వచ్చింది. దాంతో భారత్‌ చంద్రుడిపై నడిచింది’ అని అర్థం వచ్చేలా ఇస్రో ట్వీట్ చేసింది. ఇక ల్యాండర్‌లో పంపించిన రోవర్‌ పేరు ప్రగ్యాన్‌. దీని బరువు 26 కిలోలు. ఆరు చక్రాల సాయంతో చంద్రుడి ఉపరితలంపై తిరుగుతూ 14 రోజులు పనిచేస్తుంది. ఇందులో రెండు పేలోడ్‌లు ఉన్నాయి. ప్రస్తుతం రోవర్‌ తన అధ్యయనం మొదలుపెట్టింది.