Ashok Gehlot: విద్యుత్‌ వినియోగంపై ఇంధన సర్‌ఛార్జీలు రద్దు.. సీఎం గహ్లోత్‌ ప్రకటన

జైపూర్‌: రాజస్థాన్‌ ప్రజలకు ఆ రాష్ట్ర సీఎం అశోక్‌ గహ్లోత్‌(Ashok Gehlot) గుడ్‌న్యూస్‌ చెప్పారు. విద్యుత్‌ వినియోగదారుల ఇంధన సర్‌ఛార్జీలను రద్దు చేస్తున్నట్టు ప్రకటించారు. ‘‘రాష్ట్రంలోని వినియోగదారులందరికీ ఇంధన సర్‌ ఛార్జీలను రద్దు చేస్తున్నాం. ఈ నిర్ణయంతో రాష్ట్ర ప్రభుత్వంపై రూ.2500 కోట్ల అదనపు భారం పడుతుంది’’ అని తెలిపారు.  ఈ మొత్తాన్ని రాష్ట్ర ప్రభుత్వమే విద్యుత్‌ పంపిణీ సంస్థలకు చెల్లిస్తుందన్నారు. ఈ నిర్ణయంతో వ్యవసాయ, గృహ వినియోగదారులకు ఇంధన సర్‌ఛార్జీల భారం ఉండదన్నారు. 

ప్రాధేయపడినా వదల్లేదు.. మణిపుర్‌లో మరో ఆటవిక చర్య!

జైపూర్‌లోని బిర్లా ఆడిటోరియంలో నిర్వహించిన ఇందిరా గాంధీ స్మార్ట్‌ఫోన్‌ పథకం ప్రారంభోత్సవంలో సీఎం పాల్గొన్నారు. ఈ సందర్భంగా అర్హులైన మహిళలకు స్మార్ట్‌ఫోన్లను అందజేశారు. జ్ఞానమే శక్తి అనే థీమ్‌తో మహిళలకు స్మార్ట్‌ఫోన్లు ఇస్తున్నామని..  ఈ పథకం మహిళలకు సాధికారత కల్పిస్తుందని విశ్వాసం వ్యక్తంచేశారు. తొలి దశలో ఈ పథకం కింద వితంతువులు, ఒంటరి మహిళలతో పాటు  బాలికలు ఉన్న కుటుంబాలను ఎంపిక చేసినట్టు తెలిపారు. ఈ పథకం ప్రారంభ దశలో 40లక్షల మంది లబ్ధిదారులు ట్రాయ్‌ ధ్రువీకరించిన  టెలికాం సర్వీస్ ప్రొవైడర్ల నుంచి డేటా కనెక్టివిటితో ఉన్న స్మార్ట్‌ఫోన్లు, సిమ్‌కార్డులు అందుకుంటారన్నారు.