Lok Sabha Elections: ఏకంగా ఎనిమిదిసార్లు ఓటేసి.. యూపీలో యువకుడి బాగోతం!

లఖ్‌నవూ: ప్రజాస్వామ్యంలో ఓటు వజ్రాయుధం.. ఒక్క ఓటుతో ప్రభుత్వాలు కూలిపోయిన సందర్భాలున్నాయి. అయితే, లోక్‌సభ ఎన్నికల (Lok Sabha Elections) నాల్గో విడత పోలింగ్‌లో ఓ యువకుడు చేసిన పని అందరినీ దిగ్భ్రాంతికి గురిచేసింది. అతడు ఒకే పోలింగ్‌ కేంద్రంలో ఏకంగా ఎనిమిది సార్లు ఓటేయడం గమనార్హం. ఉత్తర్‌ప్రదేశ్‌లోని ఫరూఖాబాద్‌ (Farrukhabad) లోక్‌సభ నియోజకవర్గంలో ఈ వ్యవహారం వెలుగుచూసింది. ఈ బాగోతాన్ని అతడు తన ఫోన్‌లో చిత్రీకరించాడు. ప్రతీసారి ఒక ప్రధాన పార్టీ అభ్యర్థికే ఓటేస్తున్నట్లు కనిపిస్తోన్న ఈ వీడియో ప్రస్తుతం నెట్టింట వైరల్‌గా మారింది. అతడు మైనర్‌ అని.. అసలు ఓటు హక్కే లేదంటూ కూడా విమర్శలు వెల్లువెత్తాయి.

మళ్లీ వచ్చేది మోదీ సర్కార్‌.. పీవోకే విలీనం పక్కా: అమిత్‌ షా

సమాజ్‌వాదీ పార్టీ అధినేత అఖిలేశ్‌ యాదవ్‌ ఈ వీడియోను ‘ఎక్స్‌’లో షేర్‌ చేస్తూ.. భాజపాపై తీవ్ర విమర్శలు గుప్పించారు. ఎన్నికల సంఘం ఈ చర్యను తీవ్రంగా పరిగణించి.. సంబంధిత పోలింగ్‌ కేంద్రం అధికారులపై చర్యలు చేపట్టాలని డిమాండ్‌ చేశారు. ప్రభుత్వ యంత్రాంగంపై ఒత్తిడి తెచ్చి.. ప్రజాస్వామ్యాన్ని భాజపా దోచుకోవాలనుకుంటోందని కాంగ్రెస్‌ అగ్రనేత రాహుల్‌ గాంధీ విరుచుకుపడ్డారు. ఈ వ్యవహారంపై యూపీ సీఈవో స్పందిస్తూ.. ఆ సమయంలో విధుల్లో ఉన్న అధికారులను సస్పెండ్‌ చేస్తామని తెలిపారు. మరోసారి రీపోలింగ్‌కు ఏర్పాట్లు చేస్తామన్నారు. మరోవైపు.. ఆ యువకుడిపై కేసు నమోదు చేసిన పోలీసులు అతడిని అదుపులోకి తీసుకున్నట్లు తెలుస్తోంది.