Parliament: కొనసాగుతోన్న సస్పెన్షన్లు.. మరో ఇద్దరు ఎంపీల సస్పెన్షన్‌

దిల్లీ: లోక్‌సభ (Lok Sabha)లో డిసెంబరు 13 నాటి ఈ భద్రతా వైఫల్యం (Security Breach)పై హోం మంత్రి ప్రకటన చేయాలంటూ విపక్షాలు డిమాండ్‌ చేస్తున్న విషయం తెలిసిందే. దీనిపై ఆందోళనకు దిగిన పలువురు విపక్ష సభ్యులను సస్పెండ్‌ చేశారు.  బుధవారం మరో ఇద్దరు విపక్ష ఎంపీలపై స్పీకర్‌ వేటు వేశారు. ఈ సమావేశాల మొత్తానికి వారిని సస్పెండ్‌ చేస్తున్నట్లు తెలిపారు.

సభాపతి ఆదేశాలు ధిక్కరించిన సభ్యుల సస్పెన్షన్‌కు పార్లమెంటరీ వ్యవహారాల శాఖ మంత్రి ప్రహ్లాద్‌ జోషి ప్రవేశపెట్టిన తీర్మానాన్ని మూజువాణీ ఓటుతో లోక్‌సభ ఆమోదించింది. అనంతరం స్పీకర్‌ తన నిర్ణయాన్ని ప్రకటించారు. ఎంపీలు థామస్‌ చళికందన్, ఏఎం అరిఫ్‌పై వేటు వేశారు. ఈ శీతాకాల సెషన్ మొత్తానికి వారిని సస్పెండ్ చేశారు. పార్లమెంట్ చరిత్రలో ఒక సెషన్‌లో ఇంతమందిపై వేటువేయడం ఇదే తొలిసారి కావడం గమనార్హం.

పన్నూ హత్యకు కుట్ర ఆరోపణలు.. తొలిసారి స్పందించిన ప్రధాని మోదీ

లోక్‌సభలో ఇప్పటికే గతవారం 13 మందిని, సోమవారం మరో 33 మందిని సస్పెండ్ చేయగా.. మంగళవారం 49మందిపై వేటు పడింది. దీంతో దిగువ సభ నుంచి సస్పెండ్ అయిన ఎంపీల సంఖ్య 97కి చేరింది. రాజ్యసభలో ఆ సంఖ్య 46గా ఉంది.