Chiranjeevi: ఇంతకంటే నాకు కావాల్సిందేముంది.. టాలెంట్ ఒకరి సొత్తు కాదు: చిరంజీవి

హైదరాబాద్‌: ఇండియన్‌ ఎయిర్‌ ఫోర్స్‌ నేపథ్యంలో తెరకెక్కిన ‘ఆపరేషన్‌ వాలెంటైన్‌’ (Operation Valentine) సినిమా ప్రీ రిలీజ్‌ ఈవెంట్‌కు రావడం గర్వంగా ఉందన్నారు ప్రముఖ హీరో చిరంజీవి (Chiranjeevi). వరుణ్‌ తేజ్‌ (Varun Tej) ప్రధాన పాత్రలో దర్శకుడు శక్తి ప్రతాప్‌ సింగ్‌ రూపొందించిన చిత్రమిది. మానుషి చిల్లర్‌ కథానాయిక. మార్చి 1న సినిమా విడుదల కానుంది. ఈ సందర్భంగా హైదరాబాద్‌లో ఆదివారం నిర్వహించిన వేడుకకు చిరంజీవి ముఖ్య అతిథిగా హాజరయ్యారు. పద్మ విభూషణ్‌కు ఎంపికైన సందర్భంగా చిత్ర బృందం ఆయన్ను గజమాలతో సత్కరించింది.

‘‘వరుణ్‌ సాధారణంగా నాకు మెసేజ్‌లు పెట్టడు.. నేరుగా మాట్లాడతాడు. కానీ, కొన్ని రోజుల క్రితం నేను అమెరికాలో ఉన్నప్పుడు ‘నీతో మాట్లాడాలి’ అంటూ తన నుంచి మెసేజ్ వచ్చింది. ఏమైందో అనుకున్నా. హైదరాబాద్‌ తిరిగొచ్చాక ఈ సినిమా ఈవెంట్‌ సంగతి చెప్పాడు. రియల్‌ హీరోలపై తీసిన చిత్రం గురించి నువ్వు చెబితే రీచ్‌ వేరేలా ఉంటుందన్నాడు. మనల్ని రక్షించే వారియర్స్‌ గురించి చెప్పడం నాకు దక్కిన గొప్ప అవకాశంగా భావిస్తున్నా. ఈ వేడుకకు రావడం గర్వంగా ఉంది. తెలుగులో మంచి పారితోషికం ఉంటుందని, కమర్షియల్‌ డైరెక్టర్‌గా స్థిరపడిపోవచ్చనే ఉద్దేశంతో శక్తి ప్రతాప్‌ ఇక్కడకు రాలేదు. తన సొంత ఖర్చుతో సర్జికల్‌ స్ట్రైక్‌పై షార్ట్‌ ఫిల్మ్‌ తీశాడు. ఇండియన్‌ ఎయిర్స్‌ ఫోర్స్‌ అది చూసి ఆశ్చర్యపోయింది. ఈసారి సినిమా తీస్తే మరింత సమాచారం మేమిస్తామని సంబంధిత అధికారులు ఆయన్ను ప్రోత్సాహించారు. ఇలాంటి సినిమాలు ఆడాలి. ముఖ్యంగా యువత చూడాలి. ఈ చిత్రాన్ని 75 రోజుల్లో చిత్రీకరించారు. తక్కువ బడ్జెట్‌లో ఇలాంటి విజువల్స్‌ ఇవ్వడం ఆషామాషీ విషయం కాదు. ఆ విషయంలో సినిమా విడుదలకు ముందే ఆయన సక్సెస్‌ అయ్యారు. దీన్ని అందరూ స్ఫూర్తిగా తీసుకోవాలి’’

‘‘నవదీప్‌ మా కుటుంబ సభ్యుడిలాంటివాడు. రామ్‌ చరణ్‌ ‘ధ్రువ’ సినిమాలోని తన నటన నాకు ఇష్టం. ఇందులోనూ మంచి పాత్ర పోషించాడు. అభినవ్‌ ప్రతిభావంతుడు. సోషల్‌ మీడియాలో కనిపించే మీమ్స్‌లో తనే ఎక్కువగా కనిపిస్తాడు. చరణ్‌, వరుణ్‌.. ఇలా వీరంతా నన్ను చూస్తూ వేరే రంగంలోకి వెళ్లలేకపోయారు. చదువు పూర్తయ్యాక యాక్టర్ అవ్వాలనుకున్నారు. ఈ విషయంలో నేను అందరినీ ప్రోత్సహిస్తా. ఎందుకంటే చిత్ర పరిశ్రమను నేను గౌరవిస్తా. మనం ఎంతగా గౌరవిస్తే అంతగా మనల్ని అక్కున చేర్చుకుంటుందని బలంగా నమ్మా. అలాంటి ఇండస్ట్రీలోకి నా బిడ్డలొచ్చారంటే ఇంతకంటే కావాల్సిందేముంది’’

నటుడిగా వరుణ్‌ నన్ను ఎప్పుడూ ఫాలోకాలేదు. ముందు నుంచీ విభిన్న కథలు ఎంపిక చేసుకుంటూ వస్తున్నాడు. మా కుటుంబ హీరోల్లో ఎవరికీ రాని ఇలాంటి అవకాశాలు వరుణ్‌కు వచ్చాయి. ఎయిర్‌ ఫోర్స్‌పై టాలీవుడ్‌లో తెరకెక్కిన తొలి చిత్రమిదే. గతేడాది హాలీవుడ్‌ సినిమా ‘టాప్‌గన్‌’లోని విజువల్స్‌ చూసి ఇలాంటిది మనం తీయగలమా? అనుకున్నా. ‘ఆపరేషన్‌ వాలెంటైన్‌’ అదే స్థాయిలో ఉంది. టాలెంట్‌ ఒకరి సొత్తు కాదు’’ అని పేర్కొన్నారు.

‘‘మా పెద్దనాన్న నాకు స్ఫూర్తి. ఆయన మా సినిమా టీమ్‌ని విష్‌ చేయడానికి వచ్చినందుకు ఆనందంగా ఉంది. కష్టాన్ని నమ్ముకుని పైకి రావాలని ఎప్పుడూ చెబుతుంటారాయన. ఇంతమంది అభిమానుల్ని సంపాదించుకున్న ఆయనకు థ్యాంక్స్‌ చెబుతున్నా. సాయుధ బలగాలపై సినిమా చేయడం నాకు గర్వంగా ఉంది’’ అని వరుణ్‌ తేజ్‌ అన్నారు.