SSMB29: మహేశ్- రాజమౌళిల ప్రాజెక్ట్‌లో ‘ఆదిపురుష్‌’ నటుడు!

ఇంటర్నెట్‌ డెస్క్‌: ప్రముఖ హీరో మహేశ్‌బాబు (Mahesh Babu)- అగ్ర దర్శకుడు రాజమౌళి (SS Rajamouli) కాంబినేషన్‌లో సినిమా తెరకెక్కనున్న సంగతి తెలిసిందే. #SSMB29 వర్కింగ్‌ టైటిల్‌. దీనికి సంబంధించిన ఎన్నో వార్తలు ఇప్పటికే ప్రచారంకాగా తాజాగా మరొకటి సోషల్ మీడియాలో చక్కర్లు కొడుతోంది.

ఈ భారీ ప్రాజెక్ట్‌లో బాలీవుడ్‌ నటుడు ఉన్నట్లు తెలుస్తోంది. బీటౌన్‌ నటుడు దేవదత్త నాగే ఈ సినిమాలో భాగమైనట్లు ఆంగ్ల వైబ్‌సైట్స్‌లో కథనాలు వస్తున్నాయి. ‘ఆదిపురుష్‌’లో హనుమంతుడిగా నటించి అందరికీ చేరువయ్యారు దేవదత్త. ఇప్పుడు రాజమౌళి ప్రాజెక్ట్‌తో మరోసారి తెలుగు ప్రేక్షకులను అలరించేందుకు సిద్ధమైనట్లు సమాచారం. తాజాగా రాజమౌళితో ఆయన దిగిన ఫొటో కూడా వైరల్‌ కావడంతో ఈ రూమర్‌కు బలం చేకూరింది. ఇక ఇటీవల మలయాళ నటుడు పృథ్వీరాజ్‌ సుకుమారన్‌ కూడా ఈ సినిమాలో కీలకపాత్రలో నటించనున్నట్లు వార్తలు వచ్చాయి. ఆయన ఇందులో విలన్‌గా కనిపించనున్నారని టాక్‌ వినిపించింది. ఈ వార్తలన్నీ చూస్తుంటే చిత్రబృందం నటీనటుల ఎంపికలో బిజీగా ఉన్నట్లు తెలుస్తోంది. అయితే, ఈ విషయాలపై మూవీ టీమ్‌ ఇప్పటివరకు స్పందించలేదు.

రణ్‌వీర్‌ లుక్‌టెస్ట్‌ పూర్తయింది: రూమర్స్‌పై స్పందించిన ప్రశాంత్ వర్మ

అడవుల నేపథ్యంలో సాగే ఈ కథ కోసం మహేశ్‌కు సంబంధించిన ఎనిమిది లుక్‌లను రాజమౌళి టీమ్ సిద్ధం చేసినట్లు తెలుస్తోంది. మరోవైపు దీనికి ‘మహారాజ్‌’ (Maharaj) అనే టైటిల్‌ పరిశీలనలో ఉన్నట్లు సమాచారం. అత్యంత భారీ బడ్జెట్‌తో తెరకెక్కనున్న ఈ చిత్రంలో ఇండోనేషియా నటి చెల్సియా ఎలిజబెత్‌ ఇస్లాన్‌ హీరోయిన్‌గా, హాలీవుడ్‌ ప్రముఖ నటుడు క్రిస్‌ హెమ్స్‌వర్త్‌ కీలకపాత్ర పోషించనున్నారని కూడా జోరుగా ప్రచారమవుతోంది. ఇండియన్ సినిమా ఇప్పటివరకు చూడని సరికొత్త ప్రపంచాన్ని దర్శకధీరుడు ఈ చిత్రంతో సృష్టించనున్నట్లు తెలుస్తోంది.