akshay kumar: ‘హౌస్‌ఫుల్‌ 5’.. ‘జాలీ ఎల్‌ఎల్‌బీ 3’

‘బడేమియా ఛోటేమియా’తో ఇటీవలే ప్రేక్షకులను పలకరించిన బాలీవుడ్‌ కథానాయకుడు అక్షయ్‌ కుమార్‌.. ప్రస్తుతం వరుస సినిమాలతో బిజీగా గడుపుతున్నారు. ఆయన ప్రధాన పాత్రలో నటిస్తున్న చిత్రం ‘హౌస్‌ఫుల్‌ 5’. తరుణ్‌ మన్సుఖాని దీన్ని తెరకెక్కిస్తున్నారు. కామెడీ ఎంటర్‌టైనర్‌గా రూపొందుతున్న ఈ చిత్రాన్ని సాజిద్‌ నడియాడ్‌వాలా నిర్మిస్తున్నారు. తాజాగా ఈ సినిమా చిత్రీకరణను త్వరలో యూకేలో మొదలుపెట్టనున్నట్లు తెలుస్తోంది. ‘‘ప్రస్తుతం ఈ సినిమా స్క్రిప్ట్‌ పనులు ముగింపు దశలో ఉన్నాయి. ఆగస్టులో చిత్రీకరణను ప్రారంభించడానికి సన్నాహాలు చేస్తున్నారు. మొదటి షెడ్యూల్‌లో అక్షయ్‌, రితీష్‌ దేశ్‌ముఖ్‌ల మధ్య వచ్చే ఈ చిత్రానికి ముఖ్యమైన సన్నివేశాలను చిత్రీకరించనున్నారు. త్వరలో మిగతా నటీనటుల వివరాల్ని ప్రకటించనున్నార’’ని సన్నిహిత వర్గాలు తెలిపాయి. దీపావళికి విడుదల కానుందీ చిత్రం.

• ‘జాలీ ఎల్‌ఎల్‌బీ’.. కోర్టురూమ్‌ డ్రామా నేపథ్యంలో రూపొంది బాక్సాఫీసు వద్ద మంచి విజయాన్ని అందుకున్న చిత్రమిది. ఈ సిరీస్‌ చిత్రాల్లో భాగంగా తెరకెక్కిన ‘జాలీ ఎల్‌ఎల్‌బీ 2’లో అక్షయ్‌ కుమార్‌ లాయర్‌ జగదీశ్‌ మిశ్రా పాత్రలో తన నటనతో ప్రేక్షకుల్ని మెప్పించారు. ఇప్పుడీ చిత్రానికి కొనసాగింపుగా ‘జాలీ ఎల్‌ఎల్‌బీ 3’ రూపొందుతున్న సంగతి తెలిసిందే. సుభాష్‌ కపూర్‌ తెరకెక్కిస్తున్నారు. తాజాగా ఈ సినిమా చిత్రీకరణ ప్రారంభమైనట్లు ఇన్‌స్టా వేదికగా తెలిపారు అక్షయ్‌. త్వరలో దిల్లీలో జరగబోయే మరో షెడ్యూల్‌లో అక్షయ్‌ పాల్గొనున్నట్లు సన్నిహిత వర్గాలు తెలిపాయి. ఇందులో అర్షాద్‌ వార్సీ కీలక పాత్ర పోషిస్తున్నారు.