AP News: పిన్నెల్లి పరారీ.. పోలీసుల అసమర్థతకు నిదర్శనం: ప్రత్తిపాటి

అమరావతి: పిన్నెల్లి రామకృష్ణారెడ్డి పరారీ పోలీసుల అసమర్థతకు నిదర్శనమని తెదేపా నేత ప్రత్తిపాటి పుల్లారావు విమర్శించారు. నిందితులకే పోలీసులు పహారా కాస్తారని మరోసారి నిరూపించారన్నారు. వివేకా హత్య కేసు నిందితుడు అవినాష్‌ను ఇలానే దగ్గరుండి కాపాడారని ఆరోపించారు.

‘‘ఈసీ ఆదేశించినా అరెస్టు చేయకుండా ఎవరి కళ్లకు గంతలు కడుతున్నారు? జరుగుతున్న పరిణామాలు చూస్తుంటే పిన్నెల్లిని పోలీసులే విహారయాత్రకు పంపినట్లుంది. ఆయన్ను ఏపీ పోలీసులు అరెస్టు చేయరు. డీజీపీ, పోలీసులు వైకాపా ఆదేశాల మేరకు పనిచేస్తున్నారు. ఈసీ ఇకనైనా వారి నిజస్వరూపం తెలుసుకోవాలి. సీబీఐని రంగంలోకి దించాలి. పిన్నెల్లిని పట్టుకోలేని వారికి చలో మాచర్లను అడ్డుకునే హక్కు ఎక్కడిది? ఆయన్ను తప్పించడంలో మొదట్నుంచీ అధికారుల పాత్ర సుస్పష్టం’’ అని ప్రత్తిపాటి ఆరోపించారు.

పిన్నెల్లి దేశం వదిలిపెట్టి వెళ్లారేమో: దేవినేని ఉమ 

‘చలో మాచర్ల’ను పోలీసులు అడ్డుకోవడాన్ని తెదేపా నేత దేవినేని ఉమ ఖండించారు. పిన్నెల్లిపై చర్యలు ఎందుకు తీసుకోవడం లేదని ప్రశ్నించారు. ఆయన దేశం వదిలిపెట్టి వెళ్లారేమోనని అనుమానం వ్యక్తం చేశారు. ఆయన అదృశ్యం వెనుక ధనుంజయ్‌రెడ్డి ఉన్నారని ఆరోపించారు. కేంద్ర అధికారుల ఆధ్వర్యంలోనే ఓట్ల కౌంటింగ్‌ జరగాలని డిమాండ్‌ చేశారు.