Mopidevi Venkataramana: మనసు చంపుకొని పని చేయాల్సి వస్తోంది: రాజ్యసభ సభ్యుడు మోపిదేవి

రాజకీయాల్లో ఇష్టం లేని వ్యక్తులతోనూ కొనసాగక తప్పదు

ఈనాడు, అమరావతి: ఇష్టం లేని వ్యక్తుల కోసం మనసు చంపుకుని పని చేయాల్సి వస్తోందని మాజీ మంత్రి, రాజ్యసభ సభ్యుడు మోపిదేవి వెంకట రమణారావు (Mopidevi Venkataramana) వ్యాఖ్యానించారు. రాజకీయాల్లో కొనసాగాలంటే ఇష్టం లేని వ్యక్తులతో కూడా పని చేయక తప్పదన్నారు. ఆదివారం రాత్రి బాపట్ల జిల్లా చెరుకుపల్లిలో ఉపాధ్యాయుల సన్మానసభలో ఆయన చేసిన వ్యాఖ్యలు సోమవారం సామాజిక మాధ్యమాల్లో వైరల్‌ అయ్యాయి. ముఖ్యమంత్రి జగన్‌మోహన్‌రెడ్డి ఇటీవల రేపల్లె వైకాపా నియోజకవర్గ సమన్వయకర్తగా మోపిదేవిని తప్పించి, ఈవూరు గణేష్‌ను నియమించారు. అప్పటి నుంచి మోపిదేవి వర్గీయులు అసంతృప్తి వ్యక్తం చేస్తూనే ఉన్నారు. అయితే వైకాపా అధిష్ఠానానికి కట్టుబడి పని చేయాలని చెబుతున్న ఎంపీ.. తాజాగా ఈ వ్యాఖ్యలు చేశారు. రాజకీయాల్లో కొనసాగాలంటే కొన్ని ఇష్టం లేని పనులు చేయాల్సి వస్తుందని.. కొంతమంది అర్హత లేని ఉపాధ్యాయులకు అవార్డులు ఇవ్వాలని కూడా సిఫార్సు చేయాల్సి వస్తుందని ఆయన పేర్కొనడం గమనార్హం. ఈవూరు గణేష్‌ను ఉద్దేశించే మోపిదేవి ఈ వ్యాఖ్యలు చేశారని రాజకీయ వర్గాలు పేర్కొంటున్నాయి.