రూ.91,325 కోట్లు ఏమయ్యాయి?

అవినీతికి చిరునామాగా వైకాపా ప్రభుత్వం
జనసేన నేత నాదెండ్ల మనోహర్‌ ధ్వజం

తెనాలి టౌన్‌, న్యూస్‌టుడే: వైకాపా ప్రభుత్వం మూడు రాజధానులంటూ రాష్ట్రాన్ని గంజాయి, డ్రగ్స్‌కు రాజధానిగా మార్చిందని జనసేన పీఏపీ ఛైర్మన్‌, తెనాలి నియోజకవర్గ ఉమ్మడి అభ్యర్థి నాదెండ్ల మనోహర్‌ ధ్వజమెత్తారు. గుంటూరు జిల్లా తెనాలిలో ఆదివారం భాజపా నాయకులు, కార్యకర్తలతో నిర్వహించిన ఆత్మీయ సమావేశంలో ఆయన మాట్లాడారు. జగన్‌ ప్రభుత్వం అవినీతికి చిరునామాగా మారిందని, సుమారు రూ.7 లక్షల కోట్లు అప్పు చేస్తే.. అందులో రూ.91,325 కోట్లు ఎక్కడకు వెళ్లాయో ఈ రోజు వరకు లెక్క తేలలేదని ఆరోపించారు. ఈ ప్రభుత్వం ఏ విధంగా ఇష్టారాజ్యంగా వ్యవహరించిందో ఈ అంశం స్పష్టం చేసిందన్నారు. దేశానికి ప్రధాని మోదీ నాయకత్వం అవసరమని పవన్‌కల్యాణ్‌ నమ్మారని, అందుకే రాష్ట్రంలో అవినీతి ప్రభుత్వాన్ని సాగనంపడానికి ఉమ్మడిగా సాగాలని మూడు పార్టీలతో పొత్తుకు చొరవ చూపారని వెల్లడించారు.