అమ్మ మరణాన్ని తట్టుకోలేకపోతున్నా

సార్వత్రిక ఎన్నికల బరిలో దిగను
హిమాచల్‌ డిప్యూటీ సీఎం ముకేశ్‌ అగ్నిహోత్రి కుమార్తె ఆస్తా

హమీర్‌పుర్‌: లోక్‌సభ ఎన్నికల్లో పోటీ చేసేందుకు హిమాచల్‌ప్రదేశ్‌ డిప్యూటీ సీఎం ముకేశ్‌ అగ్నిహోత్రి కుమార్తె ఆస్తా అగ్నిహోత్రి విముఖత వ్యక్తం చేశారు. తన తల్లి సిమ్మి అగ్నిహోత్రి ఈ ఏడాది ఫిబ్రవరిలో గుండెపోటుతో మృతిచెందిన సంగతిని గుర్తుచేశారు. ఆమె మరణాన్ని తట్టుకోలేకపోతున్నానని.. ఇలాంటి విషాద సమయంలో ఎన్నికల్లో పోటీ చేయాలని లేదని తెలిపారు. ఈ మేరకు మీడియాతో మాట్లాడిన ఓ వీడియోను ఫేస్‌బుక్‌ వేదికగా పంచుకున్నారు. హిమాచల్‌లోని హమీర్‌పుర్‌ స్థానంలో కేంద్రమంత్రి అనురాగ్‌ ఠాకుర్‌ (భాజపా)కు వ్యతిరేకంగా ఆస్తాను బరిలో దించాలని కాంగ్రెస్‌ యోచిస్తున్న తరుణంలో ఆమె ప్రకటన వెలువడటం గమనార్హం.