రాహుల్‌ను ప్రధానిని చేయాలి: తుమ్మల

ఇల్లెందు, న్యూస్‌టుడే: పార్లమెంట్‌ ఎన్నికల్లో రాష్ట్రంలోని 15 స్థానాల్లో కాంగ్రెస్‌ అభ్యర్థులను గెలిపించాలని... రాహుల్‌గాంధీని ప్రధానిని చేయడమే లక్ష్యంగా పనిచేయాలని మంత్రి తుమ్మల నాగేశ్వరరావు పార్టీ కార్యకర్తలను కోరారు. మహబూబాబాద్‌ లోక్‌సభ నియోజకవర్గ స్థాయి మహిళా కాంగ్రెస్‌ నాయకులతో భద్రాద్రి జిల్లా ఇల్లెందులో గురువారం ఏర్పాటుచేసిన సమావేశంలో ఆయన మాట్లాడారు. 400 సీట్లలో పోటీ చేయని భాజపా...400 సీట్లు ఎలా గెలుస్తుందని ప్రశ్నించారు. పదేళ్లు ప్రధానిగా ఉన్న మోదీ తెలంగాణలోని బొగ్గు గనులు, ఆంధ్రాలోని విశాఖ ఉక్కు పరిశ్రమ ప్రైవేటీకరణ విషయంలో చూపిన శ్రద్ధ రాష్ట్రాల అభివృద్ధిలో, ఉపాధి కల్పనలో చూపలేదన్నారు. ఆరు నెలల్లో కాంగ్రెస్‌ ప్రభుత్వం పడిపోతుందని మాజీ సీఎం కేసీఆర్‌ వింతగా మాట్లాడుతున్నారని పేర్కొన్నారు. భాజపా, భారాస లోపాయికారీ ఒప్పందంతో ఎన్నికల బరిలో నిలిచాయన్నారు. శుక్రవారం మహబూబాబాద్‌లో జరిగే సీఎం రేవంత్‌రెడ్డి సభకు పెద్దఎత్తున ప్రజలు హాజరై విజయవంతం చేయాలన్నారు. సమావేశంలో ఎమ్మెల్యే కోరం కనకయ్య, డీసీసీ అధ్యక్షుడు పొదెం వీరయ్య, పురపాలక ఛైర్మన్‌ డి.వెంకటేశ్వరరావు తదితరులు పాల్గొన్నారు.