Tejashwi Yadav: పార్టీని కాపాడుకోవడానికి మామ ఏమైనా చేయగలడు: తేజస్వీ యాదవ్

పట్నా: జూన్ 4న ఎన్నికల ఫలితాలు వెలువడిన అనంతరం బిహార్‌ ముఖ్యమంత్రి మరోసారి పార్టీ మారేందుకు సిద్ధంగా ఉంటారని రాష్ట్రీయ జనతాదళ్  నేత తేజస్వీ యాదవ్ (Tejashwi Yadav) అన్నారు. బిహార్‌ మాజీ ఉప ముఖ్యమంత్రి మంగళవారం మీడియాతో మాట్లాడుతూ  ‘‘జూన్ 4 తర్వాత ముఖ్యమంత్రి నీతీష్‌కుమార్ (Nitish Kumar) తన పార్టీని, రాజకీయాల్లో వెనకబడిన తరగతులను కాపాడటానికి ఏదైనా చేయగలడు. ఎంత పెద్ద నిర్ణయమైనా తీసుకోగలడు’’ అని పేర్కొన్నారు.

కాగా ముఖ్యమంత్రి పదవి కోసం గత దశాబ్దకాలంలో నీతీష్ ఐదుసార్లు పార్టీ మారారు. కాషాయ కండువా కాదని భాజపాకు వ్యతిరేకంగా ఏర్పాటైన ఇండియా కూటమిలో చేరిన ఆయన లోక్‌సభ ఎన్నికలకు ముందు తిరిగి ఎన్డీఏ గూటికి చేరారు. దీంతో రాజకీయవర్గాలు ఆయన చర్యలపై  అసహనం వ్యక్తంచేశాయి. అనంతరం ఓ ఎన్నికల ప్రచార సభలో నీతీష్‌ మాట్లాడుతూ తాను పార్టీ మారడం ఇదే చివరిసారి అని ఎప్పటికీ భాజపాను వీడనని తెలిపారు.