Tdp-Janasena: తెదేపా-జనసేన ఉమ్మడి సభకు భారీగా తరలివచ్చిన కార్యకర్తలు

తాడేపల్లిగూడెం: తెదేపా-జనసేన కలిసి తాడేపల్లిగూడెంలో ఏర్పాటు చేసిన ‘జెండా’ సభ ప్రారంభమైంది. అడ్డంకులను దాటుకొని వివిధ ప్రాంతాల నుంచి ఇరు పార్టీల కార్యకర్తలు, అభిమానులు భారీగా తరలివచ్చారు. సభా ప్రాంగణానికి 10కి.మీ మేర కార్యకర్తల వాహనాలు నిలిచిపోయాయి. వారి వాహనాలను పోలీసులు అడ్డుకుంటున్నారు. ట్రాఫిక్‌ స్తంభించడంతో తెదేపా నేతలు అచ్చెన్నాయుడు, నిమ్మల రామానాయుడు బైకులపై సభకు చేరుకున్నారు. కూటమి తరఫున తొలి జాబితాను విడుదల చేసిన తర్వాత నిర్వహిస్తున్న తొలి ఉమ్మడి సభ ఇది. వేదికపై నాయకుల ప్రసంగాలను వీక్షించేందుకు సభాప్రాంగణంలో భారీ స్క్రీన్లు ఏర్పాటు చేశారు.

వేదికపై చంద్రబాబు.. పవన్‌

తాడేపల్లిగూడెం సభా వేదికపైకి తెదేపా అధినేత చంద్రబాబు నాయుడు, జనసేనాని పవన్‌ కల్యాణ్‌ చేరుకున్నారు. ఇరుపార్టీల జెండాలు ఊపి శ్రేణుల్లో ఉత్సాహం నింపారు. మరికాసేపట్లో తెదేపా, జనసేన నేతలకు, కార్యకర్తలకు.. చంద్రబాబు, పవన్‌ దిశానిర్దేశం చేయనున్నారు. మరోవైపు సభా ప్రాంగణమంతా ‘తెలుగు జన విజయ కేతనం’ నినాదంతో మార్మోగిపోతోంది.