Gali Janardhana Reddy: భాజపాలో చేరిన గాలి జనార్దన రెడ్డి.. పార్టీ విలీనం

బెంగళూరు: కర్ణాటక (Karnataka) మాజీ మంత్రి, కల్యాణ రాజ్య ప్రగతి పక్ష పార్టీ వ్యవస్థాపకుడు గాలి జనార్దనరెడ్డి (Gali Janardhana Reddy) భాజపా (BJP) గూటికి చేరారు. బెంగళూరులో సోమవారం పార్టీ రాష్ట్ర అధ్యక్షుడు విజయేంద్ర, సీనియర్‌ నేత బీఎస్‌ యడియూరప్ప సమక్షంలో జనార్దనరెడ్డి, ఆయన సతీమణి అరుణ లక్ష్మి కాషాయ కండువా వేసుకున్నారు. తన పార్టీని కూడా భాజపాలో విలీనం చేశారు.

ఈ సందర్భంగా ఆయన మాట్లాడుతూ.. ‘‘ప్రధాని మోదీని మూడోసారి అధికారంలో నిలబెట్టేందుకు భాజపా కార్యకర్తగా పనిచేస్తా. ఎలాంటి షరతులు లేకుండా నేను పార్టీలో చేరా. నాకు ఏ పదవులూ వద్దు’’ అని అన్నారు. గాలి జనార్దనరెడ్డి చేరికను యడియూరప్ప స్వాగతించారు. ఇది మంచి నిర్ణయమని, వచ్చే ఎన్నికల్లో తమ పార్టీ కర్ణాటకలోని 28 స్థానాల్లో విజయం సాధిస్తుందని ధీమా వ్యక్తం చేశారు. అయితే, లోక్‌సభ ఎన్నికల్లో గాలికి టికెట్‌ దక్కే అవకాశాలు లేవు. భాజపా అభ్యర్థిగా బరిలో దిగిన తన స్నేహితుడు బి.శ్రీరాములుకు మద్దతుగా ఆయన ప్రచారం చేయనున్నట్లు తెలుస్తోంది.

భాజపా అభ్యర్థిగా ‘సందేశ్‌ఖాలీ’ బాధితురాలు..

ఒకప్పుడు రాష్ట్ర రాజకీయాల్లో చక్రం తిప్పిన గాలి జనార్దనరెడ్డి అక్రమ గనుల తవ్వకాలకు పాల్పడ్డారని సీబీఐ అధికారులు 2011 సెప్టెంబరు 5న అరెస్టు చేశారు. బెయిల్‌పై బయటకు వచ్చి రాజకీయాల్లో కొనసాగినా, గతంలో మాదిరిగా ప్రభావాన్ని చూపించలేకపోయారు. ఇప్పటికీ బళ్లారి జిల్లాలోకి అడుగు పెట్టకుండా సుప్రీంకోర్టు ఆంక్షలు విధించింది. అయితే, భాజపాలో ఆయన చేరికతో బళ్లారి, కొప్పళ జిల్లాల్లో పార్టీకి మరింత బలం వస్తుందని కమలనాథులు భావిస్తున్నారు.