Anand Mahindra: నా పేరులో ‘మహీ’ ఉండటం గర్వంగా ఉంది.. ధోనీ సిక్స్‌లపై ఆనంద్‌ మహీంద్రా

ఇంటర్నెట్‌ డెస్క్‌: ఐపీఎల్‌-17లో ముంబయి ఇండియన్స్‌ను చిత్తుగా ఓడించి నాలుగో విజయాన్ని తన ఖాతాలో వేసుకుంది చెన్నై సూపర్‌కింగ్స్‌. మ్యాచ్‌ చివర్లో రంగంలోకి దిగిన మహేంద్ర సింగ్‌ ధోనీ (MS Dhoni) సిక్స్‌లతో అదరగొట్టాడు. దీనిపై ప్రముఖ పారిశ్రామిక వేత్త ఆనంద్‌ మహీంద్రా (Anand Mahindra) స్పందించారు. ఆయన ‘ఎప్పటికీ గొప్ప ఫినిషర్‌’ అంటూ మహీపై ప్రశంసల జల్లు కురిపించారు.

‘‘ధోనీ కంటే గొప్పగా రాణిస్తున్న క్రీడాకారుడిని ఒకరినైనా చూపించగలరా? అతడిపై ఉన్న అంచనాలు కావొచ్చు. జట్టు పరిస్థితి తీసుకొచ్చే ఒత్తిడి కారణమై ఉండొచ్చు. ఇవన్నీ ఆయన సంకల్పాన్ని మరింత పెంచాయి. ఆయన ఎప్పటికీ గొప్ప ఫినిషర్‌. నా పేరులో కూడా ‘మహీ’ ఉండటం గర్వంగా ఉంది’’ అని మహీంద్రా ప్రశంసించారు. ఆయన పోస్టుకు ‘మిస్టర్‌ కూల్‌’ ఫొటోను జత చేశారు.

హార్దిక్‌ను గేలిచేసింది చాలు.. అలాంటి మాటలతో విసిగిపోయా: కీరన్‌ పొలార్డ్‌

వైరల్‌గా మారిన మహీంద్రా పోస్టుపై ఇప్పటివరకు మిలియన్‌కు పైగా నెటిజన్లు స్పందించారు. ‘‘మహీ అండ్‌ మహీంద్రా ఎప్పటికీ ఎవర్‌ గ్రీన్‌’’.. ‘‘ధోనీ కొట్టిన సిక్స్‌లు ఆకాశాన్నంటాయి. లవ్‌ యూ మహీ’’ అని కామెంట్లు గుప్పించారు. కాగా.. ఐపీఎల్‌-17లో ఆదివారం ముంబయిలోని వాంఖడె స్టేడియం వేదికగా జరిగిన పోరులో 20 పరుగుల తేడాతో ముంబయి ఇండియన్స్‌పై సీఎస్‌కే గెలిచింది. మ్యాచ్‌ చివర్లో వచ్చిన మహీ వరుసగా మూడు బంతుల్లో సిక్సర్లు కొట్టాడు. కాలి నొప్పితోనే బ్యాటింగ్‌ చేసిన ధోనీ.. ఫినిషర్‌ పాత్రకు ఎప్పటిలాగే న్యాయం చేసి మరింత అభిమానాన్ని గెలుచుకున్నాడు.