Erriyon Knighton: దిగింది మరో చిరుత

ఇప్పటితరం క్రీడాభిమానులకు రన్నింగ్ ట్రాక్‌లో ఉసేన్ బోల్ట్‌ పేరు సుపరిచితం. తాజాగా మరో పరుగుల వీరుడు దూసుకొచ్చాడు. బోల్ట్‌ను మైమరిపించేలా ట్రాక్‌లో అతడు దూసుకుపోతూ రికార్డులను తన ఖాతాలో వేసుకుంటున్నాడు.

Published : 24 Aug 2023 09:48 IST

స్ప్రింట్‌ అనగానే గుర్తుకొచ్చే పేరు ఉసేన్‌ బోల్ట్‌ (Usain Bolt)! చిరుత వేగంతో ఎన్నో రికార్డులను తన ఖాతాలో వేసుకున్నాడీ జమైకా స్టార్‌. ఇప్పుడు బోల్ట్‌ బాటలోనే మరో స్ప్రింటర్‌ ట్రాక్‌లో దుమ్ము రేపుతున్నాడు. తన ఆరాధ్యం బోల్ట్‌ రికార్డునే బద్దలుకొట్టి ఔరా అనిపించాడు. అతడే ఎరియన్‌ నైటాన్‌ (Erriyon Knighton). ప్రపంచ అథ్లెటిక్స్‌ ఛాంపియన్‌షిప్‌లో ఈ అమెరికా స్ప్రింటర్‌పైనే అందరి దృష్టి నిలిచింది. 

ఫ్లోరిడాకు చెందిన నైటాన్‌ను చూస్తే ఏ ఎన్‌బీఏ ఆటగాడో అనిపిస్తాడు. అంత పొడగరి అతడు. బోల్ట్‌ మాదిరే పొడుగ్గా.. సన్నగా ఉండే ఈ కుర్రాడు.. ట్రాక్‌లో పరుగు తీస్తుంటే మిగిలిన వాళ్లు అతడి వెనుకే! నిజానికి నైటాన్‌ చిన్నప్పటి నుంచి రన్నర్‌ కాదు. ఫుట్‌బాల్‌ ఆటగాడు! ఈ ఆటలో చాలాకాలం కొనసాగిన నైటాన్‌.. తనలో ఉన్న మెరుపు వేగాన్ని ఆలస్యంగా గుర్తించాడు. లేటుగా ట్రాక్‌లోకి వచ్చినా ప్రస్తుత స్ప్రింట్‌ స్టార్లు నోవా లేల్స్‌ లాంటి వాళ్లకు కంగారు పుట్టిస్తున్నాడు.

ముద్దు వివాదం.. ఆ క్షమాపణలు సరిపోవంటూ ఫుట్‌బాల్‌ బాస్‌పై స్పెయిన్‌ పీఎం ఆగ్రహం

ఫ్లోరిడా యూనివర్సిటీ కోచ్‌ మైక్‌ హోలోవె శిక్షణలో రాటుదేలిన ఈ కుర్రాడు.. 200 మీటర్ల పరుగులో ప్రత్యర్థులకు సవాల్‌ విసురుతున్నాడు. 2020లో జూనియర్‌ ఒలింపిక్‌ క్రీడల్లో 200 మీటర్ల పరుగును 20.33 సెకన్లలో పూర్తి చేసి 15-16 వయసు విభాగంలో కొత్త రికార్డు నెలకొల్పాడు. జూనియర్‌ స్థాయిలో తన ముద్ర వేసిన ఈ కుర్రాడు.. గతేడాది యూజీన్‌లో జరిగిన ప్రపంచ అండర్‌-20 అథ్లెటిక్స్‌లో మరో సంచలనం సృష్టించాడు.

 200 మీటర్ల పరుగును 19.49 సెకన్లలో పూర్తి చేసి ఉసేన్‌ బోల్ట్‌ పేరిట 18 ఏళ్లుగా చెక్కు చెదరకుండా ఉన్న రికార్డును బద్దలు కొట్టాడు. 200 మీటర్ల పరుగును 20 సెకన్లలోపు పరుగెత్తిన తొలి అమెరికా అథ్లెట్‌గానూ అతడు ఘనత సాధించాడు. గత రెండేళ్లుగా డైమండ్‌ లీగ్‌లో 200 పరుగులో అతడికి ఎదురే లేదు. ప్రపంచ అథ్లెటిక్స్‌ కాంటినెంటల్‌ టూర్‌లోనూ నైటాన్‌దే పైచేయి. ఈ వరుస విజయాలతోనే అతడు రెండుసార్లు ప్రపంచ అథ్లెటిక్స్‌ ‘రైజింగ్‌ స్టార్‌’ అవార్డును దక్కించుకున్నాడు. 

100 మీటర్ల పరుగులోనూ నైటాన్‌ సత్తా చాటుతున్నా అతడి ప్రధాన దృష్టి 200 మీ. మీదే కేంద్రీకరించాడు. అండర్‌-20 కేటగిరిలో 200 మీటర్ల పరుగులో పదకొండుసార్లు తన రికార్డును తానే సవరించడం నైటాన్‌ సత్తాకు నిదర్శనం. అందుకే ప్రస్తుతం ప్రపంచ అథ్లెటిక్స్‌ ఛాంపియన్‌షిప్‌లో 200 మీటర్ల పరుగులో ఈ కుర్రాడు ఫేవరెట్‌గా బరిలో దిగుతున్నాడు. గతేడాది 19.31 సెకన్లలో లక్ష్యాన్ని చేరి మైకేల్‌ జాన్సన్‌ రికార్డును బద్దలు కొట్టిన నోవా లేల్స్‌కు ఈసారి నైటాన్‌తో పోటీపడి గెలవడం కష్టమే. ట్రాక్‌ మీదే కాదు రోడ్డు మీదా దూసుకెళ్లడం నైటాన్‌కు సరదా. స్పోర్ట్స్‌ కారుల్లో షికారు కొడుతూ ట్రాక్‌ సెంటర్లకు వెళుతుంటాడీ అమెరికా టీనేజర్‌. ఏదో ఒకరోజు మెక్‌లారెన్, లాంబోర్గిని కార్లు కొనాలనేది ఇతడి ఆశ. అంతేకాదు ఒకటి కాదు రెండు ఒలింపిక్స్‌ స్వర్ణాలు నెగ్గాలనేది నైటాన్‌ లక్ష్యం. ఈ ప్రపంచ ఛాంపియన్‌షిప్‌లో 200 మీటర్ల పరుగులో స్వర్ణం నెగ్గి 2024 పారిస్‌ ఒలింపిక్స్‌కు ఆత్మవిశ్వాసాన్ని పెంచుకోవాలనే ధ్యేయంతో ఉన్నాడు.

-ఈనాడు క్రీడా విభాగం

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని