India vs Australia: లెక్క సరిచేస్తారా?

ఆస్ట్రేలియాతో మూడో టీ20 నేడు
మధ్యాహ్నం 1.45 నుంచి 

హోబర్ట్‌: పొట్టి క్రికెట్‌ సిరీస్‌లో టీమ్‌ఇండియా పుంజుకోగలదా? సూర్యకుమార్‌ సేనకు మరో పరీక్ష సిద్ధం. ఆదివారమే ఆస్ట్రేలియాతో మూడో టీ20. బలమైన జట్టు ఉన్నా, రెండో టీ20లో తేలిపోయిన భారత్‌.. ఈ మ్యాచ్‌లోనైనా కంగారూల పేస్‌ను సమర్థంగా ఎదుర్కొంటుందా అన్నది చూడాలి. కెప్టెన్‌ సూర్యకుమార్‌ యాదవ్, వైస్‌ కెప్టెన్‌ శుభ్‌మన్‌ గిల్‌ ఇద్దరూ గత మ్యాచ్‌లో ఎక్స్‌ట్రా బౌన్స్, సీమ్‌ మూమెంట్‌ ఉన్న బంతులను ఎదుర్కోవడంలో ఇబ్బందిపడ్డారు. వీళ్లిద్దరు బ్యాట్‌ ఝళిపించడం జట్టుకు ఎంతో అవసరం. సంజు శాంసన్, తిలక్‌ వర్మ, శివమ్‌ దూబె కూడా పరుగుల బాట పట్టాల్సివుంది. అయితే ఆసీస్‌ ప్రధాన పేసర్‌ హేజిల్‌వుడ్‌ ఈ మ్యాచ్‌కు దూరం కావడం భారత్‌కు సానుకూలాంశమే. యాషెస్‌ సిరీస్‌ నేపథ్యంలో అతడికి విశ్రాంతినిచ్చారు. ఈ సిరీస్‌లో మిగతా మ్యాచ్‌ల్లోనూ హేజిల్‌వుడ్‌ ఆడడు. ఇక ఈ మ్యాచ్‌కైనా అర్ష్‌దీప్‌ సింగ్‌ను భారత జట్టులోకి తీసుకుంటారా అన్నది ఆసక్తికరం. టీ20ల్లో 100 వికెట్లు పడగొట్టిన ఏకైక భారత బౌలర్‌ అయినప్పటికీ అతణ్ని ఆడించకపోవడంపై విమర్శలు వ్యక్తమవుతున్నాయి. ‘‘బుమ్రా ఆడితే జాబితాలో రెండో స్థానంలో అర్ష్‌దీప్‌ పేరు ఉండాలి. బుమ్రా లేకపోతే అర్ష్‌దీప్‌ పేరే మొదట ఉండాలి’’ అని మాజీ స్పిన్నర్‌ అశ్విన్‌ వ్యాఖ్యానించాడు. కుల్‌దీప్‌ స్థానంలో అర్ష్‌దీప్‌ జట్టులోకి వచ్చే అవకాశముంది. మరోవైపు ఆస్ట్రేలియా ధీమాగా బరిలోకి దిగుతోంది. హేజిల్‌వుడ్‌ స్థానంలో సీన్‌ అబాట్‌ జట్టులోకి రావొచ్చు. మణికట్టు గాయం నుంచి కోలుకున్న మ్యాక్స్‌వెల్‌.. ఒవెన్‌ లేదా షార్ట్‌ స్థానంలో ఆడతాడు. ఆదివారం మ్యాచ్‌కు ఎలాంటి వర్షం ముప్పు లేదు.