Womens WC 2025 Final: కమాన్‌ హర్మన్ సేన.. దేశమంతా మీ వెనకే..: టీమ్‌ఇండియా క్రికెటర్లు

ఇంటర్నెట్ డెస్క్‌: ఒక్క అడుగు దూరంలో కప్‌. సుదీర్ఘ నిరీక్షణకు తెరదించాలని యావత్‌ దేశం ఆకాంక్షిస్తోంది. మహిళల వన్డే ప్రపంచ కప్‌ ఫైనల్‌లో దక్షిణాఫ్రికాతో తలపడేందుకు భారత్‌ (IND w vs SA w) సిద్ధమైంది. ఈ క్రమంలో హర్మన్‌ సేనకు టీమ్‌ఇండియా క్రికెటర్లు సూర్యకుమార్‌ యాదవ్, జస్‌ప్రీత్ బుమ్రా, సంజు శాంసన్, గిల్, అభిషేక్ శర్మతోపాటు ప్రధాన కోచ్ గౌతమ్ గంభీర్ శుభాకాంక్షలు తెలిపారు. ఆ వీడియోను బీసీసీఐ తన సోషల్ మీడియా ఖాతాలో పోస్టు చేసింది. 

‘‘భారత పురుషుల జట్టు నుంచి మహిళా టీమ్‌కు సంపూర్ణ మద్దతు ఇస్తున్నాం. మహిళల వన్డే ప్రపంచ కప్‌ (ICC Womens ODI World Cup) ఫైనల్‌లో విజయం సాధించి కప్‌ అందుకోవాలని ఆకాంక్షిస్తున్నాం. నిర్భయంగా ఆడేసి విజయం సాధించాలి. తప్పులు చేయడానికీ భయపడవద్దు. వాటి నుంచి బయటపడి గెలవాలి. ఇప్పటికే మీరు దేశం గర్వపడేలా చేశారు. ఫైనల్‌లోనూ గెలిచి కప్‌ను అందుకోవాలని కోరుకుంటున్నా’’ - గౌతమ్ గంభీర్‌

‘‘ఫైనల్‌ను ఆస్వాదించండి. తప్పకుండా విజయం వరిస్తుంది. ఆల్‌ ది బెస్ట్‌. ఇప్పటి వరకూ మీ పోరాటం అద్భుతంగా సాగింది’’ - సూర్యకుమార్‌ యాదవ్

‘‘ఆటను ఆస్వాదించండి చాలు. ఇప్పుడున్న క్రికెటర్లకు వరల్డ్‌ కప్‌ ఫైనల్స్‌ ఆడే అవకాశాలు తక్కువగా వచ్చాయి. కాబట్టి, కొత్తగా ఏమీ చేయాల్సిన అవసరం లేదు. ఆత్మవిశ్వాసం, నమ్మకం ఉంచి ఆడండి. అత్యుత్తమ ఆటతీరును ప్రదర్శించేందుకు ప్రయత్నించండి’’ - జస్‌ప్రీత్ బుమ్రా

‘‘ట్రోఫీ ఇక్కడే ఉంది. దానిని అందుకోవడమే తరువాయి. మేమంతా కేవలం ఆల్‌ ది బెస్ట్‌ మాత్రమే చెప్పగలం. పోరాడి సాధించాల్సింది మీరే. దేశమంతా మీకు అండగా ఉంది. కప్‌ను సాధించండి. ఆల్‌ ది బెస్ట్ టీమ్‌ఇండియా(Team India)’’ - శుభ్‌మన్‌ గిల్, అర్ష్‌దీప్, సంజు శాంసన్‌