Chess World Cup: చదరంగ సమరం

నేటి నుంచి ప్రపంచకప్‌ 

ట్రోఫీ ఆవిష్కరణ కార్యక్రమంలో గోవా సీఎం ప్రమోద్‌ సావంత్, ఫిడే అధ్యక్షుడు డ్వార్కోవిచ్,
కేంద్ర క్రీడల మంత్రి మన్‌సుఖ్‌ మాండవీయ తదితరులు

పంజిమ్‌ (గోవా): ఫిడే చెస్‌ ప్రపంచకప్‌నకు వేళైంది. 80 దేశాల నుంచి 206 మంది టాప్‌ ప్లేయర్లు తలపడబోతున్న ఈ మెగా టోర్నీ ఆరంభమయ్యేది శనివారమే. సొంతగడ్డపై జరుగుతున్న ఈ పోరులో ప్రపంచ ఛాంపియన్‌ దొమ్మరాజు గుకేశ్, యువ కెరటాలు అర్జున్‌ ఇరిగేశి, ప్రజ్ఞానందపైనే అందరి దృష్టి ఉంది. నాకౌట్‌ ఫార్మాట్లో జరిగే ఈ సమరంలో పోటీలను క్లాసికల్‌ పద్ధతిలో నిర్వహిస్తారు. ప్రతి రౌండ్‌కు రెండు గేమ్‌లు ఉంటాయి. ఈ కప్‌లో తొలి మూడు స్థానాల్లో నిలిచే ప్లేయర్లు 2026 క్యాండిడేట్‌ టోర్నీకి అర్హత సాధిస్తారు. ప్రపంచ ఛాంపియన్‌ కావడంతో గుకేశ్‌కు ఈ అర్హతతో పని లేదు. అతడు టైటిల్‌ సాధించడంపై దృష్టి సారించాడు. గత కొన్ని నెలలుగా ఫామ్‌లో లేని ఈ యువ ఆటగాడు.. ఈ కప్‌ ద్వారానైనా సత్తా చాటాలని కోరుకుంటున్నాడు. 

ప్రజ్ఞానంద, అర్జున్‌తో పాటు సీనియర్‌ ప్లేయర్లు పెంటేల హరికృష్ణ, విదిత్‌ గుజరాతి క్యాండిడేట్‌ టోర్నీ అర్హత కోసం పోటీపడనున్నారు. మహిళల ప్రపంచకప్‌ విజేత దివ్య దేశ్‌ముఖ్‌ కూడా ఈ టోర్నీ బరిలో ఉంది.మొత్తంగా భారత్‌ నుంచి 24 మంది క్రీడాకారులు బరిలో ఉండడం విశేషం. వీరిలో తెలంగాణ యువ ఆటగాడు రాజా రిత్విక్‌ కూడా పోటీలో ఉన్నాడు. ఈ ఏడాది ఆసియా ఛాంపియన్‌షిప్‌లో ఆకట్టుకున్న రిత్విక్‌.. ఈ టోర్నీలో ఎలా ఆడతాడో చూడాలి. ప్రపంచ నంబర్‌వన్‌ మాగ్నస్‌ కార్ల్‌సన్, అమెరికా గ్రాండ్‌మాస్టర్లు ఫాబియానో కరువానా, నకముర ఈ కప్‌లో ఆడట్లేదు. ఈ కప్‌లో టాప్‌-50 ర్యాంకు ప్లేయర్లు నేరుగా రెండో రౌండ్‌ ఆడనున్నారు. 

ట్రోఫీ.. ఆనంద్‌ పేరిట 

భారత్‌లో జరుగుతున్న చెస్‌ ప్రపంచకప్‌నకు విశ్వనాథన్‌ ఆనంద్‌ ట్రోఫీ అని నామకరణం చేరారు. శుక్రవారం ఈ టోర్నీ ఆరంభోత్సవంలో కేంద్ర క్రీడల మంత్రి మన్‌సుఖ్‌ మాండవీయ, గోవా ముఖ్యమంత్రి ప్రమోద్‌ సావంత్‌ ఈ కప్‌ను ఆవిష్కరించారు. ‘‘చెస్‌ ప్రపంచకప్‌నకు దిగ్గజ ఆటగాడు విశ్వనాథన్‌ పేరు పెడుతున్నందుకు ఎంతో గర్విస్తున్నాం’’ అని అఖిల భారత చెస్‌ సమాఖ్య వెల్లడించింది. ఆనంద్‌ అయిదుసార్లు ప్రపంచ ఛాంపియన్‌గా నిలిచాడు.