PKL: దిల్లీ ధమాకా

ప్రొకబడ్డీ ట్రోఫీ కైవసం 
ఫైనల్లో పుణెరిపై గెలుపు

ప్రొ కబడ్డీ సీజన్‌-12 ఆసాంతం ఆధిపత్యం ప్రదర్శించి.. లీగ్‌ దశలో టాప్‌-2లో నిలిచిన.. దబంగ్‌ దిల్లీ టైటిల్‌నూ పట్టేసింది. ఒత్తిడిలోనూ నిలిచి.. డిఫెన్స్‌తో అదరగొట్టిన అషు మలిక్‌ సారథ్యంలోని జట్టు ఈ సీజన్‌ విజేతగా ఆవిర్భవించింది. ఉత్కంఠభరిత ఫైనల్లో ఆ జట్టు పుణెరి పల్టాన్‌ను ఓడించింది. దిల్లీకి ఇది రెండో టైటిల్‌. రెండోసారి ఛాంపియన్‌ కావాలనుకున్న పుణెరికి నిరాశే.

దిల్లీ: సొంతగడ్డపై దిల్లీ అదరగొట్టింది. అదిరే ఆటతో ప్రొ కబడ్డీ టైటిల్‌ను గెలుచుకుంది. శుక్రవారం నువ్వానేనా అన్నట్లు సాగిన తుది పోరులో దిల్లీ 31-28తో పుణెరిని ఓడించింది. త్యాగరాజ్‌ స్టేడియంలో జరిగిన ఈ పోరులో ఆరంభం నుంచి రెండు జట్లు హోరాహోరీగా తలపడ్డాయి. మొదట దిల్లీ కాస్త ఆధిపత్యం చూపిస్తే.. తర్వాత పుణెరి పుంజుకుంది. గౌరవ్‌ సూపర్‌ ట్యాకిల్‌తో 6-7తో దిల్లీని సమీపించింది. రైడింగ్‌లో సత్తా చాటిన దిల్లీ.. నెమ్మదిగా పాయింట్ల అంతరాన్ని పెంచింది. ఆజింక్య పవార్‌ రాణించడంతో ఇంకో అయిదు నిమిషాల్లో తొలి అర్ధం ముగుస్తుందనగా పుణెరిని ఆలౌట్‌ చేసి 14-8తో నిలిచింది. దిల్లీ 20-14తో బ్రేక్‌కు వెళ్లింది. 

విరామం తర్వాత పుణెరి దూకుడు పెంచింది. పంకజ్‌ మోహిత్‌ సూపర్‌ ట్యాకిల్‌.. ఆదిత్య షిండే రెండు పాయింట్ల రెయిడ్‌తో రేసులోకి వచ్చింది. అయినా దిల్లీ దాడులు ఆపలేదు. ఆధిక్యాన్ని కొనసాగిస్తూనే వచ్చింది. చివరి క్వార్టర్‌ ఉందనగా ఆ జట్టు 24-18తో విజయం దిశగా సాగింది. కానీ పుణెరి వదల్లేదు. మహ్మద్‌ అమాన్, ఆదిత్య షిండే మెరుపులతో బలంగా పుంజుకుంది. దిల్లీని ఆలౌట్‌ చేసి 25-25తో ప్రత్యర్థిని అందుకుంది. అక్కడ నుంచి దిల్లీ డిఫెన్స్‌లో అదరగొట్టింది. కొన్ని సెకన్లలో మ్యాచ్‌ ముగుస్తుందనగా 30-28తో నిలిచిన దిల్లీ.. అదే జోరుతో ఓ పాయింట్‌ను సాధించి ట్రోఫీని ఎగరేసుకుపోయింది. నీరజ్‌ నర్వాల్‌ (9), ఆదిత్య పవార్‌ (6) దిల్లీ విజయంలో కీలకపాత్ర పోషించారు. పుణెరి తరఫున ఆదిత్య షిండే (10), పంకజ్‌ (4), అభి (4), గౌరవ్‌ (3) రాణించినా గెలిపించలేకపోయారు. 

• దిల్లీకి ఇది రెండో పీకేఎల్‌ టైటిల్‌. 2021లో తొలిసారి టైటిల్‌ గెలిచింది.
• 12 సీజన్లలో పట్నా పైరేట్స్‌ అత్యధికంగా మూడుసార్లు నెగ్గింది. దిల్లీ, జైపుర్, రెండేసి టైటిళ్లు సాధించగా.. యు ముంబా, పుణెరి పల్టాన్, హరియాణా స్టీలర్స్, బెంగళూరు బుల్స్, బెంగాల్‌ వారియర్స్‌ ఒక్కో ట్రోఫీ నెగ్గాయి. 

ప్రైజ్‌మనీ: విజేత దిల్లీకి రూ.3 కోట్లు, రన్నరప్‌ పుణెరికి  రూ.1.8 కోట్లు దక్కాయి.