David Warner: బోర్డర్-గావస్కర్ ట్రోఫీ.. అవసరమైతే ఒక్కఫోన్‌కాల్ చేయండి.. వచ్చేస్తా: డేవిడ్ వార్నర్

ఇంటర్నెట్ డెస్క్: ఆస్ట్రేలియా మాజీ ఓపెనర్ డేవిడ్ వార్నర్‌ (David Warner) బోర్డర్-గావస్కర్‌ ట్రోఫీలో ఆడాలనే ఉత్సాహంతో ఉన్నాడు. తన సేవలు అవసరమని భావిస్తే ఈ సిరీస్‌లో ఆసీస్‌ తరఫున ఆడేందుకు అందుబాటులో ఉంటానని పేర్కొన్నాడు. బోర్డర్-గావస్కర్‌లో ఆడటం కోసం అంతకంటే ముందు షెఫీల్డ్ షీల్డ్ (ఆస్ట్రేలియా దేశవాళీ టోర్నీ)లో ఆడేందుకు సిద్ధంగా ఉన్నానని తెలిపాడు. వార్నర్‌ అంతర్జాతీయ క్రికెట్‌లో అన్ని ఫార్మాట్లకు వీడ్కోలు పలికిన సంగతి తెలిసిందే. ఈ ఏడాది జనవరిలో పాకిస్థాన్‌తో టెస్టు మ్యాచ్‌తో సుదీర్ఘ ఫార్మాట్‌కు రిటైర్మెంట్ ప్రకటించాడు. 2023 వన్డే ప్రపంచ కప్‌, 2024 టీ20 ప్రపంచకప్‌తో ఆయా ఫార్మాట్లకు వీడ్కోలు పలికాడు. 

‘‘నేను ఎల్లప్పుడూ అందుబాటులో ఉంటాను. ఒక్కఫోన్‌ కాల్‌ చేయండి చాలు. ఆటపట్ల నేనెప్పుడూ సీరియస్‌గా ఉంటాను. ఫిబ్రవరి తర్వాత ఆస్ట్రేలియా ఆటగాళ్లు ఒక టెస్టు మ్యాచ్ ఆడారు. నేను కూడా దాదాపు అంతే సన్నద్ధంగా ఉన్నా. ఈ సిరీస్‌ (బోర్డర్-గావస్కర్ ట్రోఫీ)కి   ఆస్ట్రేలియాకు నేను అవసరమైతే తదుపరి షెఫీల్డ్ షీల్డ్ మ్యాచ్ ఆడతాను. ఆ టోర్నీలో ఆడితే చాలా సంతోషంగా ఉంటుంది. నేను సరైన కారణాల వల్ల ఆటకు వీడ్కోలు పలికాను. కానీ, అవసరమైతే జట్టు తరఫున ఎల్లప్పుడూ ముందుంటా. ఈ విషయంలో సిగ్గుపడను’’ అని వార్నర్ పేర్కొన్నాడు.