పంత్‌ విఫలం.. ఇండియా-ఎ 234

బెంగళూరు: ఇండియా-ఎతో జరుగుతున్న తొలి అనధికారిక టెస్టులో దక్షిణాఫ్రికా-ఎకు ఆధిక్యం లభించింది. ఓవర్‌నైట్‌ స్కోరు 299/9తో రెండో రోజు ఉదయం తొలి ఇన్నింగ్స్‌ కొనసాగించిన దక్షిణాఫ్రికా-ఎ 309 పరుగులకు ఆలౌటైంది. అనంతరం ఇండియా-ఎ తొలి ఇన్నింగ్స్‌లో 58 ఓవర్లలో 234 పరుగులకు ఆలౌటైంది. ఓపెనర్లు ఆయుష్‌ మాత్రె (65), సాయి సుదర్శన్‌ (32) తొలి వికెట్‌కు 90 పరుగులతో శుభారంభం అందించినా మిగతా బ్యాటర్లు తేలిపోయారు. దేవ్‌దత్‌ పడిక్కల్‌ (6), రజత్‌ పాటీదార్‌ (19) కెప్టెన్‌ రిషబ్‌ పంత్‌ (17) నిరాశపరిచారు. ఆయుష్‌ బదోని (38) రాణించాడు. ప్రెనెలన్‌ సుబ్రాయెన్‌ (5/61), లూథో సిపామ్లా (2/35) సత్తాచాటడంతో దక్షిణాఫ్రికా-ఎకు 75 పరుగుల ఆధిక్యం లభించింది. శుక్రవారం ఆట ముగిసే సమయానికి దక్షిణాఫ్రికా-ఎ రెండో ఇన్నింగ్స్‌లో 12 ఓవర్లలో వికెట్‌ నష్టపోకుండా 30 పరుగులు సాధించింది. మరో రెండ్రోజుల ఆట మిగిలివున్న ఈ మ్యాచ్‌లో దక్షిణాఫ్రికా-ఎ 105 పరుగుల ఆధిక్యంలో ఉంది.