380 పరుగుల లక్ష్యం అనుకున్నాం: అమన్‌జ్యోత్‌

ముంబయి: ప్రపంచకప్‌ సెమీఫైనల్లో ఆస్ట్రేలియా 380 పరుగుల లక్ష్యాన్ని నిర్దేశిస్తుందని అనుకున్నామని భారత ఆల్‌రౌండర్‌ అమన్‌జ్యోత్‌ కౌర్‌ తెలిపింది. ‘‘వీలైనంత వరకు పరుగులు నియంత్రించడానికి ప్రయత్నించా. లిచ్‌ఫీల్డ్‌ చాలా దూకుడు బ్యాటర్‌. ఆమెతో కొన్ని డాట్‌ బాల్స్‌ ఆడిస్తే భిన్నంగా ప్రయత్నిస్తుందని తెలుసు. స్టంప్స్‌ లక్ష్యంగా బౌలింగ్‌ చేయడం ప్రాథమిక ప్రణాళిక మాత్రమే. వికెట్‌ చాలా బాగుంది కాబట్టి ఆసీస్‌ 380 పరుగుల లక్ష్యాన్ని నిర్దేశిస్తుందని అనుకున్నాం. అయితే లిచ్‌ఫీల్డ్‌ ఔటవడంతో ఆట మాకు అనుకూలంగా మారింది. అక్కడ్నుంచి ఎక్కువ పరుగులివ్వలేదు. లిచ్‌ఫీల్డ్‌ వికెట్‌ తీసిన శ్రీచరణి అద్భుతంగా బౌలింగ్‌ చేసింది. వేడి వాతావరణంలో రెండో ఓవర్లో బరిలో దిగిన జెమీమా చివరి వరకు క్రీజులో ఉండటం గొప్ప విషయం. మ్యాచ్‌ను విడిచిపెట్టకుండా ఆఖరి వరకు పోరాడింది’’ అని అమన్‌జ్యోత్‌ వివరించింది.