Hyderabad vs Rajasthan: బౌలర్ల దెబ్బకు బెంబేలెత్తిన రాజస్థాన్‌.. ఫైనల్‌కు దూసుకెళ్లిన హైదరాబాద్‌

చెన్నై: గతేడాది పేలవమైన ఆటతో పాయింట్ల పట్టికలో చివరి స్థానానికి పరిమితమైన హైదరాబాద్‌.. ఈ సీజన్‌లో ఆరంభం నుంచే అద్భుతంగా ఆడి ఇప్పుడు ఏకంగా ఫైనల్‌కు చేరుకుంది. క్వాలిఫయర్‌ 2లో రాజస్థాన్‌ను 36 పరుగుల తేడాతో ఓడించి ఫైనల్లో అడుగుపెట్టింది సన్‌రైజర్స్‌. చెపాక్ వేదికగా జరిగిన మ్యాచ్‌లో తొలుత బ్యాటింగ్ చేసిన హైదరాబాద్‌ నిర్ణీత 20 ఓవర్లలో 9 వికెట్ల నష్టానికి 175 పరుగులు చేసింది. ఈ లక్ష్యఛేదనలో రాజస్థాన్‌ 139/7కు పరిమితమైంది. ఆరంభంలో ఓపెనర్ యశస్వి జైస్వాల్ (42; 21 బంతులలో 4 ఫోర్లు, 3 సిక్స్‌లు) దూకుడుగా ఆడటంతో రాజస్థాన్‌ విజయం సాధించేలా కనిపించింది. కానీ, హైదరాబాద్‌ స్పిన్నర్లు వరుసగా వికెట్లు పడగొట్టి మ్యాచ్‌పై పట్టుబిగించారు. 79 పరుగులకే 5 వికెట్లు కోల్పోయి పీకల్లోతు కష్టాల్లో పడిన రాజస్థాన్‌.. ధ్రువ్ జురెల్ (56*; 35 బంతుల్లో 7 ఫోర్లు, 2 సిక్స్‌లు) పోరాడటంతో ఆమాత్రం స్కోరైనా చేయగలిగింది. లేకుంటే భారీ తేడాతో చిత్తుగా ఓడిపోయేది. స్నిన్నర్లు (షాబాజ్‌ అహ్మద్ 3/23), అభిషేక్ శర్మ (2/24) అదరగొట్టారు. నటరాజన్, కమిన్స్‌ తలో వికెట్ తీశారు. ఆదివారం కోల్‌కతా, హైదరాబాద్‌ మధ్య టైటిల్‌ పోరు జరగనుంది. 

హైదరాబాద్‌ బ్యాటర్లలో హెన్రిచ్‌ క్లాసెన్‌ (50; 34 బంతుల్లో 4 సిక్స్‌లు) అర్ధశతకం చేయగా.. రాహుల్ త్రిపాఠి (37; 15 బంతుల్లో 5 ఫోర్లు, 2 సిక్స్‌లు) క్రీజులో ఉన్నంతసేపు మెరుపులు మెరిపించాడు. ట్రావిస్ హెడ్ (34; 28 బంతుల్లో 3 ఫోర్లు, 1 సిక్స్‌) ఫర్వాలేదనిపించాడు. అభిషేక్ శర్మ (12), నితీశ్ రెడ్డి (5), మార్‌క్రమ్ (1), అబ్దుల్ సమద్‌ (0) నిరాశపర్చారు. షాబాజ్ అహ్మద్‌ (18) రన్స్ చేశాడు. రాజస్థాన్ బౌలర్లలో ట్రెంట్ బౌల్ట్ 3, అవేశ్ ఖాన్ 3, సందీప్ శర్మ 2 వికెట్లు పడగొట్టారు. 

• సన్‌రైజర్స్‌ హైదరాబాద్‌ ఫైనల్ చేరడం ఇది మూడోసారి. 2016 ఛాంపియన్‌గా, 2018లో రన్నరప్‌గా నిలిచింది.   
• ఇంపాక్ట్ ప్లేయర్‌గా వచ్చి బ్యాటింగ్‌లో 18 పరుగులు చేసి కీలక సమయంలో 3 వికెట్లు పడగొట్టిన షాబాజ్ అహ్మద్‌ ‘ప్లేయర్‌ ఆఫ్‌ ది మ్యాచ్‌’గా నిలిచాడు.
• తొలి క్వాలిఫయర్‌లో తలపడిన కోల్‌కతాతోనే ఫైనల్‌లో తలపడనుంది హైదరాబాద్‌.