India vs South Africa: గెలుపు దూరంలో.. కలల కప్పు

దక్షిణాఫ్రికాతో భారత్‌ ఫైనల్‌ నేడు

ఎన్నో ఆశలు.. ఎన్నో అంచనాలు. భారత క్రికెట్‌ అభిమానుల చూపంతా అటువైపే. దశాబ్దాల నిరీక్షణకు తెరపడడానికి.. కప్పు కల సాకారం కావడానికి భారత మహిళలకు కావాల్సింది ఇంకొక్క విజయమే. ఆదివారమే వన్డే ప్రపంచకప్‌ ఫైనల్‌. హర్మన్‌ప్రీత్‌ కౌర్‌ నేతృత్వంలోని భారత్‌.. తొలి ట్రోఫీ కోసం ఆరాటపడుతోన్న దక్షిణాఫ్రికాను ఢీకొట్టనుంది. సంచలన బ్యాటింగ్‌తో ప్రపంచ రికార్డు లక్ష్యాన్ని ఛేదిస్తూ, మేటి జట్టు ఆస్ట్రేలియాను సెమీఫైనల్లో మట్టికరిపించిన భారత్‌.. రెట్టించిన ఉత్సాహంతో సమరానికి సిద్ధమైంది. గతంలో రెండు సార్లు అందినట్లే అంది చేజారిన కప్పును ఈసారైనా ఒడిసి పట్టాలన్నది ఆ జట్టు పట్టుదల. 2005, 2017లో భారత్‌ తుది సమరంలో భంగపడింది. విజేతగా నిలవడానికి ఆ జట్టుకు ఇదో గొప్ప అవకాశమనడంలో సందేహం లేదు. క్రికెట్‌ చరిత్రలో అత్యంత బలమైన జట్లయిన ఆస్ట్రేలియా, ఇంగ్లాండ్‌లలో ఒక్కటి కూడా లేకుండా జరుగుతున్న తొలి ప్రపంచకప్‌ ఫైనల్‌ ఇదే కావడం విశేషం. అంటే మనం కొత్త ప్రపంచ ఛాంపియన్‌ను చూడబోతున్నామన్న మాట. ఫైనల్‌కు వర్షం అంతరాయం కలిగించే అవకాశముంది. మ్యాచ్‌కు రిజర్వ్‌ డే ఉంది.