Mohammed Shami: ఛాంపియన్స్ ట్రోఫీకి ముందు 9 కేజీలు తగ్గిన షమీ!

ఇంటర్నెట్ డెస్క్‌: ఐసీసీ ట్రోఫీ అంటే భారత స్టార్‌ పేసర్ మహ్మద్ షమీ (Shami) చెలరేగిపోతాడు. దాదాపు 14 నెలల తర్వాత ఇంగ్లండ్‌తో టీ20 సిరీస్‌తో అంతర్జాతీయ క్రికెట్‌లోకి అడుగు పెట్టిన షమీ.. ఛాంపియన్స్ ట్రోఫీ (ICC Champions Trophy 2025) తొలి మ్యాచ్‌లోనే ఐదు వికెట్ల ప్రదర్శన చేశాడు. బంగ్లాదేశ్‌పై 5/53 గణాంకాలను నమోదు చేసిన షమీ వన్డే, ఛాంపియన్స్ ట్రోఫీల్లో అత్యధిక వికెట్లు తీసిన భారత బౌలర్‌గా నిలిచాడు. అయితే, ఈ టోర్నీకి ముందు ఫిట్‌నెస్ సాధించేందుకు తీవ్రంగా కష్టపడ్డాడు. దాదాపు 9 కేజీల వరకు బరువు తగ్గినట్లు షమీ తెలిపాడు. ఆ వీడియోను బీసీసీఐ తన సోషల్ మీడియా ఖాతాలో పోస్టు చేసింది. గాయం నుంచి కోలుకునేందుకు జాతీయ క్రికెట్ అకాడమీలో చాన్నాళ్లు సమయం గడిపానని.. దేశవాళీ క్రికెట్‌లో ఆడటం వల్ల బౌలింగ్‌లో రిథమ్‌ను అందుకోవడం సులువైందని షమీ వెల్లడించాడు. భారత మాజీ క్రికెటర్ నవ్‌జ్యోత్ సిద్ధూతో షమీ చిట్‌చాట్‌ నిర్వహించాడు. 

సిద్ధూ: హాయ్‌ షమీ.. నువ్వు ఎలా ఐదారు కేజీలు బరువు తగ్గావు? 

షమీ: నేను 9 కేజీలు తగ్గా.

సిద్ధూ: అస్సలు అన్నమే తినలేదా? బిర్యానీ కూడా తినలేదా? 

షమీ: గాయం నుంచి కోలుకుని వచ్చేందుకు చాలా శ్రమించా. నేను ఎన్‌సీఏకు వెళ్లినప్పుడు దాదాపు 90 కేజీల వరకు ఉన్నా. నేనెప్పుడూ రుచి కోసం తినాలనుకోను. అలాగే ఎక్కువగా స్వీట్లు తినను. అలాంటి వాటికి చాలా దూరంగా ఉంటా. ఇక బిర్యానీ విషయంలోనే కొంత ఆందోళన ఉండేది. అప్పుడప్పుడు చేసే చీట్‌మీల్‌తో పెద్ద సమస్య ఉండేది కాదు. నేను 2015 నుంచి రోజుకు ఒక్క పూటే తింటున్నా. బ్రేక్‌ఫాస్ట్‌, లంచ్‌ చేయను. నేరుగా డిన్నర్‌ చేస్తా. ఇది మొదట్లో కష్టంగా అనిపించినా.. అలవాటైతే ఈజీ అయిపోతుంది