Shami - Team India: పునరాగమనం కోసం తహతహ.. షమీని మళ్లీ చూడగలమా?

టీమ్‌ఇండియాకు దూరంగా సీనియర్‌ పేసర్‌.. పట్టించుకోని సెలక్టర్లు

భారత క్రికెట్‌ చరిత్రలోనే అత్యుత్తమ పేస్‌ బౌలర్లలో ఒకడు మహ్మద్‌ షమీ. చాలా ఏళ్ల పాటు మూడు ఫార్మాట్లలో జట్టుకు కీలక బౌలర్‌గా ఉన్నాడు. ముఖ్యంగా టెస్టులు, వన్డేల్లో అతడికి గొప్ప రికార్డు ఉంది. దిగ్గజాల జాబితాలో నిలిచే స్థాయి ఉన్న ఈ బౌలర్‌.. టీమ్‌ఇండియాకు క్రమక్రమంగా దూరం అయిపోతున్నాడు. సెలక్టర్ల తీరు చూస్తుంటే.. షమీ మళ్లీ భారత జట్టుకు ఆడగలడా అన్న సందేహాలు కలుగుతున్నాయి.

2023 వన్డే ప్రపంచకప్‌ సందర్భంగా షమీ పేరు ఎంతగా మార్మోగిందో గుర్తుండే ఉంటుంది. సొంతగడ్డపై అప్రతిహత విజయాలతో భారత జట్టును ఫైనల్‌కు చేర్చడంలో షమీది అత్యంత కీలక పాత్ర. 24 వికెట్లతో ఆ టోర్నీలో అత్యుత్తమ బౌలర్‌గా నిలిచాడు షమీ. తన కెరీర్లో మరెన్నో ఉత్తమ ప్రదర్శనలు ఉన్నా.. ఆ ప్రపంచకప్‌లో షమీ బౌలింగ్‌ మెరుపులను అభిమానులు అంత సులువుగా మరిచిపోలేరు. కానీ అంత గొప్ప ప్రదర్శన తర్వాత షమీకి టీమ్‌ఇండియాలో ఇబ్బందికర పరిస్థితి తప్పలేదు. ప్రపంచకప్‌లో గాయంతో దాదాపు ఏడాది పాటు అతను మైదానానికి దూరంగా ఉన్నాడు. గత ఏడాది చివర్లో కోలుకొని ఆటలోకి వచ్చినా, భారత జట్టులో తిరిగి చోటు సంపాదించడం కష్టమైపోయింది. ఆస్ట్రేలియాతో సిరీస్‌కు షమీకి జట్టులో చోటివ్వలేదు సెలక్టర్లు. దేశవాళీల్లో ఆడి ఫిట్‌నెస్, ఫామ్‌ను చాటుకున్నా అతడికి అవకాశం దక్కలేదు. టెస్టుల్లో ఆడేంత పరిపూర్ణ ఫిట్‌నెస్‌ షమీకి లేదన్నట్లుగా మాట్లాడాయి జట్టు వర్గాలు. అప్పటి కెప్టెన్‌ రోహిత్‌ శర్మ సైతం ఇదే విషయం చెప్పాడు.

ఆపై ఇంగ్లాండ్‌తో టీ20 సిరీస్‌లో షమీని ఆడిస్తే ఆశించినంత ప్రదర్శన చేయలేదు. 3 మ్యాచ్‌ల్లో 3 వికెట్లే తీశాడు. తర్వాత ఛాంపియన్స్‌ ట్రోఫీలో తలపడే భారత వన్డే జట్టులో షమీకి ఛాన్స్‌ లభించింది. కానీ ఆ టోర్నీలోను షమీ అంచనాలను అందుకోలేకపోయాడు. బలహీన బంగ్లాదేశ్‌పై 5 వికెట్లు తీసినా.. మిగతా 4 మ్యాచ్‌ల్లో 4 వికెట్లే పడగొట్టాడు. పాకిస్థాన్‌ మీద ఒక్క వికెట్టూ తీయలేకపోయాడు. దీంతో ఈ టోర్నీ తర్వాత షమీని సెలక్టర్లు పూర్తిగా పక్కన పెట్టేశారు. ఇంగ్లాండ్‌ పర్యటనలో టెస్టు జట్టుకు ఎంపిక చేయలేదు. ఆసియా కప్‌ టీ20 టోర్నీలో ఆడించలేదు. ప్రస్తుత ఆస్ట్రేలియా సిరీస్‌లోనూ అతడికి ఛాన్సివ్వలేదు. వివిధ ఫార్మాట్లలో జట్టు ఎంపిక సందర్భంగా షమీ పేరును సెలక్టర్లు అసలు పరిగణనలోకే తీసుకోవట్లేదనే సంకేతాలు కనిపిస్తున్నాయి. దీంతో అతని కెరీర్‌పై నీలినీడలు కమ్ముకుంటున్నాయి.

మాటల దాడి

టీమ్‌ఇండియాకు షమీని ఎంపిక చేయకపోవడంపై ఇటీవల అతడికి, చీఫ్‌ సెలక్టర్‌ అజిత్‌ అగార్కర్‌కు మధ్య పరోక్షంగా మాటల దాడి జరుగుతోంది. షమీ ఫిట్‌నెస్‌ మీద అగార్కర్‌ సందేహాలు వ్యక్తం చేస్తున్నాడు. టెస్టులు ఆడేంత పూర్తి ఫిట్‌నెస్‌ షమీలో లేదన్నట్లు అతను మాట్లాడాడు. దీనికి షమీ కూడా దీటుగానే బదులిచ్చాడు. తాను రంజీల్లో ఆడుతున్నానంటే ఫిట్‌గా ఉన్నట్లేనని.. ప్రతిసారీ తన ఫిట్‌నెస్‌ గురించి సెలక్టర్లకు ప్రత్యేకంగా సమాచారం ఇవ్వలేనని అతనన్నాడు. ఇన్నేళ్ల కెరీర్లో షమీ ఎప్పుడూ ఇలా సెలక్షన్‌ గురించి బహిరంగ వ్యాఖ్యలు చేసింది లేదు. తాజాగా షమీ రంజీల్లో సత్తా చాటాడు. 2 మ్యాచ్‌ల్లో 15 వికెట్లు తీశాడు. అనంతరం అతను మాట్లాడుతూ.. టీమ్‌ఇండియాకు మళ్లీ ఆడాలని ఉందని.. రాణించడం వరకే తన పని అని, మిగతాదంతా సెలక్టర్ల చేతుల్లో ఉందని వ్యాఖ్యానించాడు. కానీ భవిష్యత్‌ ప్రణాళికల దృష్ట్యా సెలక్టర్లు షమీ వైపు చూడట్లేదనే చర్చ జరుగుతోంది.

• వన్డేల్లో విరాట్.. టీ20ల్లో గిల్ ఆటతీరు ఒకటే: డీకే

35 ఏళ్ల షమీ, ఇప్పుడు ఉన్న ఫిట్‌నెస్‌తో టెస్టులు ఆడలేడన్నది సెలక్టర్ల అభిప్రాయంగా కనిపిస్తోంది. అతను టెస్టులాడి రెండేళ్లు దాటిపోవడం గమనార్హం. మరోవైపు వన్డేలు ఆడడమే తక్కువ. ఆస్ట్రేలియాకు అతన్ని ఎంపిక చేయలేదంటే.. 2027 ప్రపంచకప్‌ ప్రణాళికల్లో అతను లేడనే అనిపిస్తోంది. టీ20ల్లో షమీ ఆడడమే తక్కువ. పైగా ఈ ఏడాది ఐపీఎల్‌లో విఫలమయ్యాడు. వచ్చే ఏడాది పొట్టి ప్రపంచకప్‌ కోసం యువ బౌలర్లకే ఎక్కువగా అవకాశాలు ఇస్తున్నారు. ఈ నేపథ్యంలో ఏ ఫార్మాట్లోనూ షమీకి పరిస్థితులు ఆశాజనకంగా కనిపించడం లేదు. వయసు, ఫిట్‌నెస్‌ అతడికి ప్రతికూలతలుగా మారాయి. ఈ నేపథ్యంలో షమీని మళ్లీ టీమ్‌ఇండియా జెర్సీలో చూసే అవకాశాలు తక్కువగానే కనిపిస్తున్నాయి.

- ఈనాడు క్రీడావిభాగం