Virat Kohli: భారత క్రికెట్‌లో ఒకే ఒక్కడు.. 50+ స్కోర్లలో కోహ్లీ ‘సెంచరీ’

ఇంటర్నెట్‌డెస్క్‌ : ఐపీఎల్‌ తొలి మ్యాచ్‌లో అంతగా ఆకట్టుకోని విరాట్‌ కోహ్లీ(Virat Kohli).. రెండో మ్యాచ్‌లో చెలరేగిపోయాడు. చిన్నస్వామి స్టేడియంలో జరిగిన మ్యాచ్‌లో అద్భుత ప్రదర్శనతో జట్టుకు తొలి విజయాన్ని అందించాడు. ఈ క్రమంలో ఈ పరుగుల వీరుడు అరుదైన ఘనత సాధించాడు. 

పంజాబ్‌తో జరిగిన మ్యాచ్‌లో ఈ ఛేజ్‌ మాస్టర్‌ 49 బంతుల్లో 11 ఫోర్లు, రెండు సిక్స్‌లతో చెలరేగి 77 పరుగులు చేశాడు. ఈ క్రమంలో టీ20 క్రికెట్‌లో వంద సార్లు 50+ స్కోరు సాధించిన తొలి భారత ఆటగాడిగా రికార్డుల్లోకెక్కాడు. ఇందులో ఎనిమిది శతకాలు ఉన్నాయి. 110 సార్లు ఈ ఘనత సాధించి యూనివర్స్‌ బాస్‌ క్రిస్‌ గేల్‌ తొలి స్థానంలో ఉండగా.. ఆ తర్వాత డేవిడ్‌ వార్నర్‌(109) నిలిచాడు. మూడో స్థానంలో కోహ్లీ కొనసాగుతున్నాడు. 377 ఇన్నింగ్స్‌లో విరాట్‌ ఈ మైలు రాయిని చేరుకోవడం విశేషం.

కోహ్లీకి ఈ సీజన్‌లో తొలి అర్ధశతకం ఇది. 31 బంతుల్లోనే దీనిని సాధించాడు. మరోవైపు టీ20 క్రికెట్‌లో అత్యధిక క్యాచ్‌లు అందుకున్న భారత ఆటగాడిగా కోహ్లీ నిలిచాడు. నిన్నటి మ్యాచ్‌లో బెయిర్‌స్టో క్యాచ్‌ పట్టడంతో మొత్తం 173తో ఈ జాబితాలో సురేశ్‌ రైనా(172)ను వెనక్కి నెట్టి తొలి స్థానానికి చేరాడు. ఆ తర్వాత స్థానాల్లో రోహిత్‌ శర్మ(167), మనీశ్‌ పాండే(146) ఉన్నారు. రెండు మ్యాచ్‌లు ఆడి ఒక విజయాన్ని నమోదు చేసిన బెంగళూరు.. తన తదుపరి మ్యాచ్‌లో కోల్‌కతాతో తలపడనుంది.