Yashasvi Jaiswal: ఒకే సిరీస్‌లో 600+ పరుగులు.. యశస్వి మరో రికార్డ్‌

రాంచీ: ఇంగ్లాండ్‌తో జరుగుతున్న టెస్ట్‌ సిరీస్‌ (IND vs ENG Test Match)లో వరుస డబుల్‌ సెంచరీలతో అదరగొట్టిన యువ సంచలనం యశస్వి జైస్వాల్‌ (Yashasvi Jaiswal) మరో అరుదైన రికార్డ్‌ సాధించాడు. ఒకే సిరీస్‌లో 600లకు పైగా పరుగులతో అదరగొట్టి ఈ ఘనతను అందుకున్న ఐదో భారత ఆటగాడిగా నిలిచాడు.

గతేడాది వెస్టిండీస్‌ పర్యటనతో టెస్టుల్లో అరంగేట్రం చేసిన ఈ లెఫ్ట్‌ హ్యాండ్‌ బ్యాట్స్‌మన్‌.. తాజా సిరీస్‌లో అద్భుతంగా రాణిస్తున్నాడు. రెండు ద్విశతకాలు నమోదు చేశాడు. కేవలం ఏడు ఇన్నింగ్స్‌ల్లోనే 618 పరుగులు (తొలి టెస్టులో 80, 15; రెండో టెస్టులో 209, 17; మూడో టెస్టులో 10, 214; నాలుగో టెస్టు తొలి ఇన్నింగ్స్‌లో 73) సాధించాడు.

ఫుడ్ నచ్చలేదన్న హార్దిక్‌.. సిబ్బందిపై పంత్‌ సీరియస్‌: ఐపీఎల్‌ యాడ్ వీడియోలు లీక్‌

యశస్వి కంటే ముందు దిలీప్‌ సర్దేశాయ్‌, సునీల్‌ గావస్కర్‌, రాహుల్‌ ద్రవిడ్‌, విరాట్‌ కోహ్లీ ఇలా ఒకే టెస్టు సిరీస్‌లో 600 కంటే ఎక్కువ పరుగులు చేసి రికార్డ్‌ సృష్టించారు. 1970-71లో వెస్టిండీస్‌తో జరిగిన సిరీస్‌లో దిలీప్‌ ఈ ఘనత సాధించాడు. గావస్కర్‌, కోహ్లీ తమ కెరీర్‌లో రెండుసార్లు ఈ మైలురాయిని దాటారు.

1970-71లో జరిగిన అదే వెస్టిండీస్‌ సిరీస్‌లో గావస్కర్‌ ఏకంగా 774 పరుగులు చేయగా.. 1978-79లో ఇదే జట్టుపై మరోసారి 732 పరుగులతో చెలరేగాడు. ఇప్పటివరకు భారత్‌ తరఫున ఒక టెస్టు సిరీస్‌లో 700లకు పైగా పరుగులు చేసిన ఏకైక ఆటగాడు గావస్కరే. తాజా సిరీస్‌లో మిగిలిన మూడు ఇన్నింగ్స్‌ల్లోనూ యశస్వి ఇదే ఫామ్‌ కొనసాగిస్తే ఈ రికార్డ్‌ను కచ్చితంగా అధిగమిస్తాడనడంలో ఎలాంటి సందేహం లేదు.

ఇక, టెస్టు క్రికెట్‌ చరిత్రలోనే ఆస్ట్రేలియా దిగ్గజం డొనాల్డ్‌ బ్రాడ్‌మన్‌ ఒక సిరీస్‌లో అత్యధిక పరుగులు చేసిన ఆటగాడిగా నిలిచాడు. 1930లో ఇంగ్లాండ్‌పై ఐదు టెస్టుల్లో అతడు ఏకంగా 974 పరుగులు చేశాడు.