గ్రూప్‌-1 మళ్లీ నిర్వహించాలి

గన్‌పార్కు ధర్నాలో కల్వకుంట్ల కవిత

నిరుద్యోగులకు మద్దతుగా నిర్వహించిన ధర్నాలో కల్వకుంట్ల కవిత

నారాయణగూడ, న్యూస్‌టుడే: తక్షణమే గ్రూప్‌-1 నియామకాలు రద్దు చేసి, మళ్లీ పరీక్ష నిర్వహించాలని తెలంగాణ జాగృతి అధ్యక్షురాలు కల్వకుంట్ల కవిత ప్రభుత్వాన్ని డిమాండ్‌ చేశారు. ఆందోళనలు చేస్తున్న నిరుద్యోగులకు మద్దతుగా జాగృతి ఆధ్వర్యంలో బుధవారం హైదరాబాద్‌లోని గన్‌పార్కులో తెలంగాణ అమరవీరుల స్తూపం వద్ద ధర్నా నిర్వహించారు. కవిత, జాగృతి కార్యకర్తలు, నిరుద్యోగులు ప్లకార్డు పట్టుకొని ప్రభుత్వానికి వ్యతిరేకంగా నినాదాలు చేశారు. ఈ సందర్భంగా కవిత మాట్లాడుతూ ‘ఇంత జరుగుతున్నా ప్రభుత్వంలో చలనం లేకపోవడం అప్రజాస్వామికం. గ్రూప్‌-1లో ప్రిలిమ్స్‌ నుంచీ అవకతవకలు జరిగాయి. ఈ పరీక్ష తెలంగాణ బిడ్డల కోసమా? కాంగ్రెస్‌ పార్టీ నాయకుల పిల్లల కోసమా? నిరుద్యోగులకు ఎందుకింత అన్యాయం చేస్తున్నారు? రెండు లక్షల ఉద్యోగాలని నమ్మించి, పాత ఉద్యోగాలిచ్చి కాంగ్రెస్‌ గొప్పలు చెప్పుకొంటోంది. తెలంగాణలోని మేధావులు మౌనం వీడాలి, నిరుద్యోగులకు మద్దతుగా గళం విప్పి సర్కారును నిలదీయాలి’ అని పేర్కొన్నారు.