గోల్ఫ్‌ ఈవెంట్‌కు ఆతిథ్యం ఇవ్వడం గర్వకారణం: మంత్రి జూపల్లి

ఐజీఎఫ్‌ఆర్‌ అధ్యక్షుడు రాబర్ట్‌ను సన్మానిస్తున్న మంత్రి జూపల్లి

ఈనాడు, హైదరాబాద్‌: అంతర్జాతీయ గోల్ఫ్‌ ఈవెంట్‌కు ఆతిథ్యం ఇచ్చే అవకాశం తెలంగాణకు రావడం గర్వకారణమని మంత్రి జూపల్లి కృష్ణారావు పేర్కొన్నారు. ఆదివారం హైదరాబాద్‌లో 60వ ఐజీఎఫ్‌ఆర్‌ (ఇంటర్నేషనల్‌ గోల్ఫింగ్‌ ఫెలోషిప్‌ ఆఫ్‌ రోటేరియన్స్‌) అంతర్జాతీయ గోల్ఫ్‌ ఛాంపియన్‌ షిప్‌ను మంత్రి ప్రారంభించి మాట్లాడారు. ‘‘వారం రోజుల పాటు జరిగే ఈ పోటీల్లో 24 దేశాలకు చెందిన 180 మంది రోటరీ గోల్ఫ్‌ క్రీడాకారులు పాల్గొంటున్నారు. ప్రసూతి, శిశు, ఆరోగ్య కార్యక్రమాలపై అవగాహన కల్పించే ఉద్దేశంతో ఈ ఛాంపియన్‌షిప్‌ పోటీలను నిర్వహిస్తున్నారు. హైదరాబాద్‌లో అద్భుతమైన ఫలక్‌నుమా ప్యాలెస్, గోల్కొండ కోట వంటి పర్యాటక ప్రాంతాలను ఈ ఛాంపియన్‌ షిప్‌లో భాగస్వామ్యం చేశాం. క్రీడలతో పర్యాటకం అభివృద్ధి ముడిపడి ఉంది. గోల్ఫ్‌ ఛాంపియన్‌షిప్‌ పోటీలు రాష్ట్రానికి ప్రత్యేక గుర్తింపు తీసుకొస్తాయి’’ అని ఆయన పేర్కొన్నారు.