WHO: డబ్ల్యూహెచ్‌వోలో బంగ్లా ప్రధాని కుమార్తెకు కీలక పదవి

దిల్లీ: ప్రపంచ ఆరోగ్య సంస్థ (WHO)లో బంగ్లాదేశ్‌ (Bangladesh) ప్రధాని షేక్‌ హసీనా (Sheikh Hasina) కుమార్తె సైమా వాజెద్‌ (Saima Wazed) కీలక పదవి చేపట్టనున్నారు. డబ్ల్యూహెచ్‌వో ఆగ్నేయ ఆసియా ప్రాంత తదుపరి రీజినల్‌ డైరెక్టర్‌గా వాజెద్‌ నామినేట్‌ అయ్యారు. ఈ మేరకు బుధవారం జరిగిన డబ్ల్యూహెచ్‌వో రీజినల్‌ కమిటీ 67వ సమావేశంలో నిర్ణయం తీసుకున్నారు.

ఈ పదవికి సైమా వాజెద్‌తో పాటు డబ్ల్యూహెచ్‌వో సీనియర్‌ అధికారి డా. శంబు ప్రసాద్‌ ఆచార్య కూడా పోటీపడ్డారు. ఆయనను నేపాల్‌ ప్రతిపాదించింది. ఈ క్రమంలోనే దిల్లీలో బుధవారం జరిగిన రీజినల్‌ కమిటీ సమావేశంలో దీనిపై ఓటింగ్‌ చేపట్టారు. ఇందులో వాజెద్‌కు అనుకూలంగా 8 ఓట్లు వచ్చాయి. ఆచార్యకు రెండు ఓట్లు వచ్చాయి. దీంతో వాజేద్‌ను నామినేట్‌ చేస్తున్నట్లు కమిటీ తీర్మానించింది.

పిల్లలున్నవారికి ప్రోత్సాహకాలు ఉండాలి..! మస్క్‌ వ్యాఖ్య

వచ్చే ఏడాది జనవరి 22-27 మధ్య జెనీవాలో జరిగే 154వ డబ్ల్యూహెచ్‌వో ఎగ్జిక్యూటివ్‌ బోర్డు సమావేశంలో ఆమె ఎన్నికను ఆమోదించనున్నారు. 2024 ఫిబ్రవరి 1 నుంచి వాజెద్‌.. రీజినల్‌ డైరెక్టర్‌గా బాధ్యతలు చేపట్టనున్నట్లు ప్రపంచ ఆరోగ్య సంస్థ తమ ప్రకటనలో వెల్లడించింది. ఐదేళ్ల పాటు ఆమె ఈ పదవిలో కొనసాగనున్నారు. తన ఎంపికపై సైమా వాజెద్‌ ఆనందం వ్యక్తం చేశారు. ప్రస్తుతం ఆమె ఆటిజం, న్యూరోడెవలప్‌మెంటల్‌ డిజార్డర్‌ వంటి వ్యాధులపై బంగ్లా జాతీయ అడ్వైజరీ కమిటీకి ఛైర్‌పర్సన్‌గా ఉన్నారు.

ఈ రీజినల్‌ కమిటీలో బంగ్లాదేశ్, నేపాల్‌తో పాటు భారత్‌, భూటాన్‌, ఉత్తరకొరియా, ఇండోనేషియా, మాల్దీవులు, మయన్మార్‌, శ్రీలంక, థాయ్‌లాండ్‌, తైమోర్‌ లెస్తే సభ్య దేశాలుగా ఉన్నాయి.