Passport Seva 2.0: దుబాయ్‌లో ఎన్‌ఆర్‌ఐల కోసం.. పాస్‌పోర్ట్ సేవా ప్రోగ్రామ్‌

ఇంటర్నెట్‌డెస్క్‌: ఎన్‌ఆర్‌ఐల కోసం దుబాయ్‌ (Dubai)లోని భారత కాన్సులేట్ జనరల్.. పాస్‌పోర్ట్ సేవా ప్రోగ్రామ్ 2.0 (GPSP 2.0)ను ఆవిష్కరించింది. ఆధునికీకరించిన ఈ ప్రోగ్రామ్‌ మంగళవారం నుంచి అమల్లోకి వచ్చింది. పాస్‌పోర్టు సేవలను రిజిస్టర్ చేసుకోవడానికి, దరఖాస్తు చేసుకోవడానికి దరఖాస్తుదారులు కొత్తగా లాంచ్‌ అయిన ఆన్‌లైన్‌ పోర్టల్‌ను వినియోగించాల్సి ఉంటుంది. అప్లికేషన్ ప్రాసెస్‌, సర్వీస్ సెంటర్లలో ఎదురుచూపులు తగ్గించేందుకు ఈ సేవను అందుబాటులోకి తీసుకువచ్చారు.

పాస్‌పోర్ట్ సేవా ప్రోగ్రామ్ 2.0 కింద ఈ-పాస్‌పోర్టులను తీసుకువచ్చారు. ఈ సాంకేతికతతో ఇమిగ్రేషన్ క్లియరెన్స్‌లు వేగవంతం కానున్నాయి. భారత్‌ అందించే సేవలు అంతర్జాతీయ ప్రమాణాలకు అనుగుణంగా మారనున్నాయి. వీసా అవసరాలకు తగ్గట్టుగా ఫొటో, సంతకం, ఇతర పత్రాలను నేరుగా ఆ పోర్టల్‌లోకి అప్‌లోడ్‌ చేసుకోవచ్చు. దాంతో బీఎల్‌ఎస్‌ ఇంటర్నేషనల్ సెంటర్లలో ప్రాసెసింగ్ టైమ్ తగ్గే అవకాశం ఉంటుంది. యూఏఈలో ఉన్న ప్రవాస భారతీయుల కోసం ఈ ప్రోగ్రామ్ ఆధునికీకరణ చేపట్టినట్లు కాన్సులేట్ (Consulate General of India in Dubai) వెల్లడించింది. ఈ సరికొత్త సేవలు పొందేందుకు యూజర్లు ఈ పోర్టల్‌లో రిజిస్టర్ అయి, లాగిన్ కావాల్సి ఉంటుంది. కొత్త అప్లికేషన్‌ను జనరేట్ చేసి, ఫార్మ్‌ను ప్రింట్‌ తీసుకోవాలి. తర్వాత బీఎల్‌ఎస్ ఇంటర్నేషనల్ ద్వారా అపాయింట్‌మెంట్‌ బుక్ చేసుకోవాలి.