ఆయుధాల ఉత్పత్తిని భారీగా పెంచండి

అధికారులకు కిమ్‌ ఆదేశం

సియోల్‌: ఉత్తర కొరియా అధినేత కిమ్‌ జోంగ్‌ ఉన్‌ మరోసారి తమ ప్రధాన ఆయుధ కర్మాగారాలను సందర్శించారు. అధునాతన క్షిపణులతో పాటు ఇతర యుద్ధ ఆయుధాల ఉత్పత్తిని భారీగా పెంచాలని అధికారులను ఆదేశించారు. ఈ మేరకు ఆ దేశ అధికారిక మీడియా సోమవారం తెలిపింది. యుద్ధానికి సిద్ధం కావాలంటూ ఇటీవల అధికారులకు పిలుపునిచ్చిన కిమ్‌ ఇప్పుడు ఆయుధాల తయారీకి సంబంధించి కీలక ఆదేశాలు ఇవ్వడం చర్చనీయాంశం అయింది. ఇదిలా ఉండగా దక్షిణ కొరియా-అమెరికా దళాలు సంయుక్త సైనిక విన్యాసాలకు సమాయత్తమవుతున్న నేపథ్యంలో కిమ్‌ ఆయుధ కర్మాగారాల సందర్శన ప్రాధాన్యత సంతరించుకుంది. అయితే ఉక్రెయిన్‌-రష్యా యుద్ధం నేపథ్యంలో రష్యాకు ఆయుధాల విక్రయ నిమిత్తం కిమ్‌ తాజా ఆదేశాలు జారీ చేసినట్లు విశ్లేషకులు అభిప్రాయపడుతున్నారు.