దేశాలను వణికిస్తున్న వైట్‌ లంగ్‌ సిండ్రోమ్‌

వాషింగ్టన్‌: బ్యాక్టీరియల్‌ నిమోనియాకు సంబంధించిన ఒక కొత్త రకం ఇన్‌ఫెక్షన్‌.. చైనా, డెన్మార్క్‌, అమెరికా, నెదర్లాండ్స్‌ను వణికిస్తోంది. ‘వైట్‌ లంగ్‌ సిండ్రోమ్‌’గా పిలుస్తున్న ఈ రుగ్మత ప్రధానంగా     3-8 ఏళ్ల వయసు చిన్నారులకు సోకుతోంది. ఈ వ్యాధి బాధితుల ఊపిరితిత్తులకు స్కాన్‌ నిర్వహించినప్పుడు తెల్లరంగు మచ్చల్లాంటివి కనిపిస్తాయి. అందువల్లే దానికి ఆ పేరు పెట్టారు. మైకోప్లాస్మా నిమోనియే అనే బ్యాక్టీరియాలోని కొత్త వేరియంట్‌తో ఈ ఇన్‌ఫెక్షన్‌ కలుగుతున్నట్లు భావిస్తున్నారు. చాలారకాల యాంటీబయాటిక్స్‌ దీనిపై పనిచేయవని నిపుణులు చెబుతున్నారు. డెన్మార్క్‌లో ఇది మహమ్మారి స్థాయికి చేరుతోందని కథనాలు వస్తున్నాయి. నెదర్లాండ్స్‌లోనూ ఆందోళనకర రీతిలో వ్యాప్తి చెందుతోంది. అమెరికాలోని ఒహాయోలో ఈ కేసులు నమోదవుతున్నాయి. దీని  బారినపడిన చిన్నారులు ఆసుపత్రుల్లో చేరాల్సి వస్తోంది. వైట్‌ లంగ్‌ సిండ్రోమ్‌.. దగ్గు, తుమ్ములు, సంభాషణలు, శ్వాస ద్వారా వ్యాప్తి చెందుతుంది. శ్వాస నుంచి వెలువడే చిన్నపాటి తుంపర్లలో ఈ వ్యాధి కారక సూక్ష్మజీవులు ఉంటాయి. ఈ వ్యాధి సోకినవారిలో జ్వరం, దగ్గు, శ్వాసలో ఇబ్బంది, ఛాతిలో నొప్పి, అలసట వంటి లక్షణాలు కనిపిస్తాయి. ఇటీవల చైనాలో పెరిగిన శ్వాసకోశ ఇన్‌ఫెక్షన్లకు ఈ కొత్త వ్యాధికారకంతో సంబంధం లేదని అమెరికా అధికారులు తెలిపారు.